वर्गणीसाठी अश्लील शिवीगाळ अन् मारहाण, अपमान सहन न झाल्याने वृद्धाने आयुष्य संपवलं, मन हेलावणारी घटना
बुलढाणा: एका ६० वर्षीय वयोवृद्ध व्यक्तीने रेल्वे रुळावर रेल्वे खाली येत आपली जीवनयात्री संपवली आहे. या वृद्धाने ज्या कारणामुळे आपल्या आयुष्याची अखेर केली ते अत्यंत धक्कादायक आहे. अपमान सहन न झाल्याने या वृद्धाने ही टोकाचा निर्णय घेतल्याचं सांगितलं जात आहे. या वृद्ध व्यक्तीला वर्गणीसाठी अश्लील शिवीगाळ आणि मारहाण करण्यात आली होती. त्यातून त्यांनी हा भयंकर निर्णय घेत आत्महत्या केली. आनंद पटावकर असं या साठ वर्षीय वृद्धाचं नाव असल्याची माहिती आहे. त्यांच्या मुलीने या प्रकरणी तक्रार केली आहे.
अश्लील शिवीगाळ, वर्गणसाठी मारहाण अन् वृद्धाचा जीव गेला
आनंद पाटकर यांना वर्गणीसाठी आलेल्यांनी चापटा बुक्क्यांनी मारहाण केली, तसेच अश्लील शिवीगाळही केला. हा अपमान सहन न झाल्याने आनंद पटावकर हे रेल्वे रुळावर गेले आणि त्यांनी रेल्वे पुढे येत आपली जीवन यात्रा संपवली. ही खळबळजनक घटना बुलढाणा जिल्ह्यातील शेगाव येथील रेल्वे कॉलनी नावकार मळ्याजवळ घडल्याची माहिती आहे. या घटनेने परिसरात एकच गोंधळाची परिस्थिती निर्माण झाली होती. आनंद पटावकर यांच्या मृत्यूने परिसरात हळहळ व्यक्त केली जात आहे.
तक्रारीनुसार मोनिका आनंद सोनार (वय वर्ष ३२) राहणार सुरज केसरी नगर नंदुरबार, यांचे वडील आनंद पटावकर (वय वर्ष ६०) राहणार रेल्वे कॉलनी. आनंद पटावकर यांनी १२ ऑक्टोबर रोजी रेल्वे खाली येत आत्महत्या केली. दरम्यान, त्यांच्याजवळ सापडलेल्या सुसाईड नोटवरून त्यांनी सचिन गोविंद खानापुरे, गजानन अशोक वंजारे, दिनेश पहुरकर (तिघेही राहणार रेल्वे कॉलनी नावकार मळा) यांनी अपमानित आणि मारहाण केल्यामुळे आत्महत्या केल्याचं नमुद करण्यात आलं आहे.
या तिघांमुळेच आपल्या वडिलांनी आत्महत्या केल्याचा आरोप मोनिका सोनार यांनी तक्रारीत केला आहे. या तक्रारीवरून शेगाव शहर पोलिसांनी गुन्हा वर्ग करुन घेतला. तिन्ही आरोपी विरोधात मंगळवारी २९ ऑक्टोबर रात्री भारतीय संविधान कलम १०८ (३)(४) अन्वये गुन्हा दाखल केला आहे. पुढील तपास सह पोलीस निरीक्षक नंदकुमार आयरे करत आहेत.
