गृहखात्याच्या बदल्यात शिवसेनेला भाजपकडून शिंदेंना कोणती ऑफर ?

महाराष्ट्रात उपमुख्यमंत्रिपदावरुन जे नाराजीनाट्य सुरु होतं, त्यावर अखेर पूर्णविराम लागला आहे. देवेंद्र फडणवीस यांच्या अथक प्रयत्नांनंतर एकनाथ शिंदे हे आजच्या शपथविधी सोहळ्यात उपमुख्यमंत्रिपदाची शपथ घेण्यास तयार झाले असल्याची माहिती आहे. त्यामुळे शपथविधीली अवघे काही तास शिल्लक असताना उपमुख्यमंत्रिपदाचा सस्पेन्स अखेर संपला आहे. आजच्या शपथविधी सोहळ्यात देवेंद्र फडणवीस, एकनाथ शिंदे आणि अजित पवार शपथ ग्रहण करतील. देवेंद्र फडणवीस हे मुख्यमंत्रिपदाची शपथ घेतील, तर एकनाथ शिंदे आणि अजित पवार हे उपमुख्यमंत्रिपदाची शपथ घेणार आहेत

शिंदे उपमुख्यमंत्रिपदाची शपथ घेणार की नाही ? प्रश्न सुटला

गेल्या काही दिवसांपासून एकनाथ शिंदे हे उपमुख्यमंत्रिपदाची शपथ घेणार की नाही यावर निर्णय होत नव्हता. सुरुवातीला शिंदेंनी सुपुत्र आणि खासदार श्रीकांत शिंदे यांना उपमुख्यमंत्रिपद द्यावं अशी मागणी केली होती. नंतर शिंदे हे गृहमंत्रिपदासाठी अडून बसले होते. त्यामुळे महायुतीचा शपथविधी ही लांबणीवर पडला. शिंदेंना समजवण्यासाठी भाजप नेते गिरीश महाजन यांनीही प्रयत्न केले. तरी, शिंदे त्यांच्या मागणीवर ठाम होते.

तसेच, शिंदे हे उपमुख्यमंत्रिपदाची शपथ घेणार की नाहीत यावर संभ्रम होता. शपथविधीला अगदी काही तास शिल्लक असतानाही शिंदेंच्या शपथविधीबाबतचा प्रश्न सुटलेला नव्हता. त्यामुळे आज फक्त फडणवीस आणि अजित पवार शपथ घेतील, असं चित्र दिसत होतं. मात्र, विधीमंडळ गटनेतेपदी निवड झाल्यानंतर देवेंद्र फडणवीस यांनी बुधवारी संध्याकाळी दोनवेळा शिंदेंची वर्षा बंगल्यावर जाऊन भेट घेतली. पण, तरी शिंदे त्यांच्या मागणीवर ठाम होते. गृहमंत्रिपदाशिवाय होणाऱ्या शपथविधी सोहळ्यात आणखी काही मंत्र्यांचाही शपथविधी व्हावा अशीही मागणी शिंदेंनी केली होती.

त्यानंतर पुन्हा फडणवीसांनी शिंदेंची नाराजी दूर करण्याचे प्रयत्न केले आणि अखेर त्यांच्या प्रयत्नांना यश आलं आहे. अखेर एकनाथ शिंदे हे आज देवेंद्र फडणवीस आणि अजित पवारांसह शपथ ग्रहण करतील. पंतप्रधान नरेंद्र मोदी यांच्या उपस्थितीत हे तीनही नेते शपथ घेणार आहेत.