बिहार :- एक धक्कादायक घटना बिहारच्या सहरसा जिल्ह्यातून समोर आली आहे. १२ वर्षांपूर्वी एका महिलेने
तिच्या प्रियकरासोबत प्रेमविवाह केला होता. आता १२ वर्षांनंतर ती महिला दुसऱ्या एका व्यक्तीच्या प्रेमात पडली. हा प्रकार जेव्हा महिलेच्या पतीला समजला तेव्हा त्याने आपल्या पत्नीचे तिच्या प्रियकराशी लग्न लावून दिले. या संपूर्ण प्रकरणाचा व्हिडिओ सोशल मीडियावर व्हायरल होत आहे.
पहिला विवाह पळून
मिळालेल्या माहितीनुसार, हे संपूर्ण प्रकरण बिहारमधील सहरसा येथील बैजनाथपूर गावचे आहे. येथे राहुवा तुलसीयाही गावातील तरुणीवर १२ वर्षांपूर्वी एका तरुणाचे प्रेम झाल होते. दोघांनीही लग्न करण्याची आपली इच्छा घरच्यांना सांगितली, पण त्यांच्या घरचे तयार नव्हते. परंतु तरीही घरच्यांच्या विरोधाला न जुमानता प्रियकर आणि प्रेयसीने लग्न केले. लग्नानंतर दोघांना तीन मुले झाली. दोघांचेही जीवन सुरळीत चालू होते.
मदतनीसावर जडलं प्रेम
दरम्यान, तरुणीचे हृदय गावात राहणाऱ्या एका दुसऱ्या तरुणावर जडले. वास्तविक, आंतरजातीय विवाहानंतर या तरुणाने मुलीला सरकारी योजनांचा लाभ मिळवून देण्यासाठी मदत केली होती. आणि याच दरम्यान या तरुणाची आधीच प्रेमविवाह झालेल्या तरुणीशी जवळीक वाढली आणि हळूहळू दोघांचे प्रेमप्रकरण सुरु झाले.
पतीने प्रियकराशी लग्न लावून दिले
१६ डिसेंबरच्या रात्री तरुण महिलेच्या घरी पोहोचला, त्याचवेळी महिलेचा पती अचानक घरी आला आणि त्याने पत्नीला प्रियकरासह रंगेहात पकडले. यानंतर महिलेच्या पतीने दोघांनाही समाज आणि पोलिसांसमोर उभे केले. महिलेने आपले प्रेमप्रकरण सर्वांसमोर उघडपणे स्वीकारले आणि प्रियकरासोबत कायमचं राहण्याची इच्छा व्यक्त केली. या प्रकारानंतर महिलेच्या पतीने महिलेचे तिच्या प्रियकराशी लग्न लावून दिले. दुसऱ्यांदा प्रेमविवाह केल्यानंतर महिलेने पहिल्या पतीची तीन मुले सोबत ठेवण्याची इच्छा व्यक्त केली, परंतु तिच्या पहिल्या पतीने मुलांना घेऊन जाण्याची परवानगी नाकारली. मुलं आता पहिल्या नवऱ्याकडे असून, महिला तिच्या प्रियकरासोबत राहू लागली आहे.
लग्नाचा व्हिडिओ सोशल मीडियावर व्हायरल
गावकऱ्यांसमोर झालेल्या या लग्नाचा व्हिडिओ सोशल मीडियावर व्हायरल होत आहे. या संपूर्ण घटनेवर लोकांच्या वेगवेगळ्या प्रतिक्रिया आहेत. या प्रकरणी महिलेच्या पहिल्या पतीने सांगितले की, तो तिच्यावर मनापासून प्रेम करतो, मात्र तिचा आनंद आता तिच्या प्रियकराकडे राहण्यात आहे. मी फक्त तेच केले ज्याने तिला आनंद मिळाला. दुसऱ्या पतीने सांगितले की, आमचं एकमेकांवर खूप प्रेम आहे आणि समाजाने आम्हाला स्वीकारले असून आम्ही एकत्र राहत आहोत.
