पाकिस्तानात सापडला मोठा खजिना! शरीफ बदलणार देशातील गरिबीची ‘हवा’?
इस्लामाबाद :- एका नवीन माहितीनुसार, पाकिस्तानमध्ये तेलाचा मोठा साठा सापडला आहे. या बाबतची घोषणा पाकिस्तान पेट्रोलियम लिमिटेड (पीपीएल) ने सिंध प्रांतातील सुजावल जिल्ह्यातील शाह बंदर ब्लॉकमध्ये तेल आणि वायूचे नवीन साठे शोधल्यासंदर्भात केली आहे. कंपनीने पाकिस्तानी स्टॉक एक्स्चेंजला तेल साठ्याच्या शोधाची माहिती दिली. स्टॉक एक्स्चेंजला दिलेल्या या माहितीनुसार, शाह बंदर ब्लॉकमधील झांप पूर्व X-१ विहीर दररोज १० दशलक्ष मानक घनफूट नैसर्गिक वायू आणि १५० बॅरलपेक्षा जास्त हलके तेल तयार करत आहे.
या विहिरीतील नैसर्गिक जलाशयाचा दाब २,८०० पौंड प्रति चौरस इंच आहे. या विहिरीतून काढलेल्या वायूवर सुजावल गॅस प्रोसेसिंग प्लांटमध्ये प्रक्रिया केली जात आहे. आणि सुई सदर्न गॅस कंपनीच्या प्रणालीमध्ये जोडली जात आहे. ज्यामुळे या प्रदेशात नैसर्गिक वायूचा पुरवठा वाढला आहे. शाह बंदर ब्लॉकमध्ये भागधारकांचा एक संघ आहे. या संघामध्ये पीपीएलचा ६३ टक्के हिस्सा आहे. मारी पेट्रोलियमकडे ३२ टक्के तर सिंध एनर्जी होल्डिंग आणि गव्हर्नमेंट होल्डिंग्ज (प्रा.) लिमिटेडकडे प्रत्येकी २.५ टक्के हिस्सा आहे.
शरीफ यांनी गॅस पुरवण्याचे आदेश दिले
यापूर्वी, हिवाळ्याच्या काळात घरगुती ग्राहकांना सतत आणि विश्वासार्ह गॅस पुरवठा सुनिश्चित करण्याचे आदेश पाकिस्तानचे पंतप्रधान शहबाज शरीफ यांनी अधिकाऱ्यांना दिले होते. पाकिस्तानातील घरगुती ग्राहकांना बऱ्याचदा गॅस टंचाईचा सामना करावा लागतो. या समस्येबाबत चिंता व्यक्त करत शाहबाज शरीफ यांनी गॅस पुरवठा व्यवस्थेत तातडीने सुधारणा करण्याची मागणी केली आणि घरगुती ग्राहकांना गॅस उपलब्ध करून देणे ही सरकारची सर्वोच्च प्राथमिकता असल्याचा पुनरुच्चार केला.
यापूर्वीही गॅसचे साठे सापडले आहेत
पाकिस्तानमध्ये गॅसचे साठे सापडण्याची हि पहिलीच वेळ नसून, याआधी सप्टेंबरमध्येही पाकिस्तानमध्ये गॅसचे प्रचंड साठे सापडल्याची बातमी आली होती. या बातमीनंतर पाकिस्तानच्या हद्दीत पेट्रोलियम आणि नैसर्गिक वायूचा मोठा साठा सापडला. हा साठा एवढा प्रचंड आहे की, त्यातून ऊर्जा काढली तर देशाचे नशीब बदलू शकते.
