पुण्यातील बहीण-भाऊ केरळच्या हॉटेलमध्ये मृतावस्थेत; चिठ्ठी लिहून संपवलं आयुष्य

    पुण्याचे रहिवासी असलेल्या भावा-बहिणीचा केरळमध्ये दुर्दैवी अंत झाल्याची घटना समोर आली आहे. पुण्यातील भाऊ - बहीण एका हॉटेलमध्ये मृतावस्थेत आढळले आहेत. हॉटेल कर्मचाऱ्यांनी दरवाजा ठोठावूनही प्रतिसाद न मिळाल्याने दरवाजा उघडला असता, भाऊ फाशी घेतलेल्या अवस्थेत आणि बहिणीचा मृतदेह बेडवर पडलेला आढळला.
   पोलिसांना घटनास्थळी आढळली सुसाइट नोट

घटनास्थळी पोलिसांना एक सुसाइड नोट सापडली असून त्यात दोघांनी धक्कादायक बाब लिहिली आहे. “आमच्याकडे ना घर आहे, ना नोकरी. आमचा मृतदेह नातेवाईकांकडे सुपूर्द करू नका”, असं त्या नोटमध्ये लिहिलं होतं.
डाकताई कोन्तिबा बामन (४८) आणि मुक्ता कोन्तिबा बामन (४५) अशी मृत भावा-बहिणीची नावं आहेत. ते दोघे पुण्यातील रहिवासी होते. मृतावस्थेत असलेली बहीण दिव्यांग होती. त्यामुळे दिव्यांग बहिणीच्या उपचारासाठी दोघे तिरुवनंतपुरमला आल्याचा संशय व्यक्त केला जात आहे.
पुण्यातील बहीण-भावाने केरळमध्ये आयुष्य संपवलं
शुक्रवारी, १७ जानेवारी रोजी दोघे भाऊ – बहीण यांवी थंपनूर येथील एका हॉटेलमध्ये चेक-इन केले होते. एक दिवस दोघंही तिथेच हॉटेलमध्ये राहिले. मात्र रविवारी सकाळीपासून त्यांच्या हॉटेल रूममधून कोणत्याही हालचाली झाल्या नाहीत. रुममधून हालचाल न झाल्याने कर्मचाऱ्यांना काहीतरी संशयास्पद जाणवलं आणि त्यांनी लगेच याबाबतची माहिती पोलिसांना दिली. पोलिसांनी तात्काळ घटनास्थळी येऊन दरवाजा उघडला. त्यावेळी दोघे भाऊ-बहीण मृतावस्थेत असल्याचं दिसलं. भाऊ फासावर लटकलेल्या अवस्थेत, तर बहीण हॉटेलमधील बेडवर पडलेली होती. प्राथमिक तपासात भावाने आधी बहिणीची हत्या करून नंतर आत्महत्या केल्याचा अंदाज पोलिसांनी व्यक्त केला आहे.
दोघंचे मृतदेह शवविच्छेदन अहवालासाठी केरळमधील रुग्णालयात पाठवण्यात आले आहेत. दोघांचा मृत्यू नेमका कसा झाला हे शवविच्छेदन अहवाल आल्यानंतरच समोर येईल. शवविच्छेदन अहवालातूनच मृत्यूचे नेमके कारण स्पष्ट होईल, अशी माहिती पोलिसांनी दिली आहे. सध्या घटनास्थळी मिळालेल्या सुसाइड नोटच्या आधारे पोलीस अधिक तपास करत आहेत. मात्र भावा-बहिणीच्या अशाप्रकारच्या निधनाने हळहळ व्यक्त होत आहे.