तेलंगणात पतीने पत्नीची हत्या करून मृतदेहाचे तुकडे कुकरमध्ये शिजवले; धक्कादायक तपास सुरू
मुंबईच्या मीरा रोड येथील सरस्वती हत्याकांड कदाचित कोणी विसरलं असेल. येथे राहणाऱ्या मनोज सानेने आपली लिव्ह इन पार्टनर सरस्वतीची हत्या केल्यानंतर तिच्या बॉडीचे तुकडे करुन ते कुकरमध्ये शिजवले होते. या हत्याकांडाने मुंबईसह संपूर्ण राज्यात एकच खळबळ माजली होती. आता अशाच प्रकारचं आणखी एक प्रकरण समेर आलं आहे. तेलंगणातील हैदराबादमध्ये एका पतीने आपल्या पत्नीची हत्या करुन तिच्या मृतदेहाचे तुकडे केले आणि ते कुकरमध्ये शिजवले.
रंगारेड्डी जिल्ह्यातील मीरपेट येथील रहिवासी लष्कराचा माजी जवान गुरुमुर्ती असं पतीचं नाव आहे. तर व्यंकटा माधवी (३५) असं पत्नीचं नाव आहे. गुरुमुर्तीने व्यंकटा माधवीची हत्या करून तिच्या मृतदेहाचे तुकडे करून प्रेशर कुकरमध्ये शिजवले. यासोबतच जिलेलागुडा येथील चंदन तलाव परिसरातही तिच्या शरीराचे काही भाग फेकण्यात आल्याची माहिती आहे. या घटनेने पोलीसही हादरले आहेत.
याप्रकरणी पोलिसांनी दिलेल्या माहितीनुसार, मृत महिलेच्या पालकांनी १३ जानेवारी २०२५ ला मीरपेठ पोलीस ठाण्यात ती हरवल्याची तक्रार दाखल केली होती. प्रकाशम जिल्ह्यातील जेपी चेरुवू येथे राहणारा आरोपी गुरुमूर्ती हा डीआरडीओमध्ये आउटसोर्स सुरक्षा रक्षक म्हणून काम करत होता. तो त्याची पत्नी व्यंकट माधवी (३५) आणि त्यांच्या दोन मुलांसोबत न्यू व्यंकटेश्वरा नगर कॉलनी, जिलेलागुडा येथे राहत होता. मात्र, गेल्या काही दिवसांपासून व्यंकटा माधवी या बेपत्ता होत्या.
या प्रकरणाचा तपास सुरू असताना आरोपी गुरुमूर्ती याने त्याला या घटनेबाबत काहीही माहिती नसल्याचे भासवले आणि चौकशीसाठी सासरच्या मंडळींसह पोलीस ठाण्यात गेला. या प्रकरणाच्या तपासादरम्यान पोलिसांना कळालं की गेल्या काही दिवसांपासून या पती-पत्नीमध्ये वाद सुरु होते. त्याआधारे चौकशीसाठी गुरुमूर्तीला ताब्यात घेतलं. यावेळी चौकशीदरम्यान गुन्ह्याची धक्कादायक माहिती समोर आली. त्याने पत्नी व्यंकटा माधवीची हत्या केल्याचं कबुल केलं.
आतापर्यंत मिळालेल्या माहितीनुसार, गुरुमूर्तीने संशयाच्या आधारे पत्नीची हत्या केली. त्यानंतर त्याने व्यंकटा माधवीच्या मृतदेहाचे तुकडे केले. या गुन्ह्याचा पुरावा नष्ट करण्याच्या प्रयत्नात त्याने शरीराचे काही भाग प्रेशर कुकरमध्ये शिजवले. तर काही भाग जिलेलागुडा येथील चंदन तलाव परिसरात फेकले.
गुरुमूर्ती हा लष्कराचा सेवानिवृत्त जवान आहे. सध्या तो कंचनबाग येथे सुरक्षा गार्ड म्हणून काम करत होता. १३ वर्षांपूर्वी त्याचा व्यंकटा माधवी हिच्याशी लग्न झालं होतं. त्यांना दोन मुलंही आहेत. सध्या पोलीस या प्रकरणी पुरावे गोळा करत आहेत. तसेच, व्यंकटा माधवीच्या मृतदेहाचे तुकडेही मिळवण्याचा प्रयत्न करत आहेत.
