मध्य प्रदेश: जुगारात हरल्यानंतर पतीने पत्नीला जबर मारहाण केली, विजेचे झटके दिले
भोपाळ: जुगार खेळणाऱ्या पतीने आपल्या पत्नीवर जुगारात दाव लावला आणि तो तिला हरला. मध्य प्रदेशातील एका गावात ही धक्कादायक घटना घडली आहे. हरल्यानंतर तो घरी परतला आणि त्याने पत्नीला सांगितले की, जर तिला त्याच्यासोबत राहायचे असेल तर तिला पैसे द्यावे लागतील. जेव्हा पत्नीने यासाठी नकार दिला तेव्हा पतीने तिच्याशी अमानुष वर्तन केले, तिला जबर मारहाण केली. प्रदीप सिंग गौर असं त्या निर्दयी पतीचं नाव आहे.
हे प्रकरण मध्य प्रदेशातील छतरपूर जिल्ह्यातील गुलगंज पोलीस स्टेशन हद्दीतील बुकना गावातील असल्याची माहिती आहे. पीडितेचा आरोप आहे की तिचा पती प्रदीप सिंह गौर याने तिला विवस्त्र केले आणि निर्दयीपणे मारहाण केली. इतकंच नाही तर तिच्या प्रायव्हेट पार्टला विजेचे झटके दिले. पीडितेला गंभीर दुखापत झाली, त्यानंतर तिने स्थानिक पोलिस ठाण्यात याबाबत तक्रार दाखल केली आहे.
या प्रकरणात न्याय न मिळाल्याने तिने आई-वडील आणि बहिणीसह एसपींचं ऑफिस गाठलं. या महिलेची प्रकृती इतकी वाईट होती की तिला नीट चालताही येत नव्हतं.
या प्रकरणी पीडित महिलेने सांगितले की, तिच्या पतीला जुगार आणि दारुचे व्यसन आहे. तो अनेकदा जुगारात घरातील वस्तू हरायचा. पण यावेळी त्याने सर्व मर्यादा ओलांडल्या. प्रदीपने तिच्यावर जुगारात दाव लावला आणि हरल्यानंतर तो घरी आला. त्यानंतर तो तिच्याकडे पैसे मागू लागला. तिने पैसे देण्यास नकार दिल्याने प्रदीपसह तिचे सासरे आणि सासरच्या इतर लोकांनी तिला विवस्त्र करून रात्रभर मारहाण केली.
पीडितेच्या जबाबाच्या आधारे पोलिसांनी प्रदीप सिंग गौरसह तिघांवर महिलेचा छळ आणि मारहाणीच्या कलमांखाली गुन्हा दाखल केला. छतरपूरचे अतिरिक्त एसपी विक्रम सिंह यांनी दिलेल्या माहितीनुसार, हे प्रकरण कौटुंबिक वादाचे असून आरोपींच्या अटकेसाठी छापेमारी सुरू आहे.
पीडितेने सांगितले की तिला आता तिच्या पतीसोबत राहायचे नाही. कारण, तो तिच्या जीवाला धोका बनला आहे. पतीने गावकऱ्यांकडून पैसे उधार घेण्यास भाग पाडले आणि अनोळखी व्यक्तींशी बोलण्यासाठी दबाव टाकला, असा आरोपही पीडितेने केला आहे. सध्या पोलिस याप्रकरणाचा तपास करत आहेत.
