राष्ट्रवादी काँग्रेसच्या बड्या नेत्याच्या नावाने घातला दीड कोटींचा गंडा
राष्ट्रवादी काँग्रेसचे नेते प्रफुल पटेल यांच्या नावाने मध्य मुंबईतील एका सीएला तब्बल दीड कोटी रुपयांचा गंडा घालण्यात आला आहे. त्यांच्या परिचयातील व्यक्तीच्या शंभरपेक्षा अधिक कंपन्या असून, या कंपन्यांचे काम मिळवून देतो सांगून सीएला फसविण्यात आले. याप्रकरणी सीएने केलेल्या तक्रारीवरून अक्रम सत्तार या व्यक्तीच्या विरोधात फसवणुकीचा गुन्हा दाखल करण्यात आला आहे. प्रफुल पटेल यांच्या नावाने थेट फसवणूक करण्यात आल्याने मोठी खळबळ निर्माण झाली. आपली फसवूक झाल्याचे लक्षात येताच सीएने पोलिसात धाव घेतली.
ठाणे येथे वास्तव्यास असलेल्या सीएचे दादर पूर्वेला कार्यालय आहे. त्यांनी दिलेल्या तक्रारीनुसार, अक्रम त्याच्या कार्यालयात आला. प्रफुल पटेल आणि रवी जैन हे आपल्या चांगल्या परिचयातील असून ते आपल्याला काम देत असल्याचे तो म्हणाला. त्यांच्या माध्यमातून तुम्हालाही कंपन्यांचे काम मिळवून देऊ शकतो, असे अक्रम याने सांगितले. पटेल आणि जैन यांच्या परिचयाचे दोन व्यावसायिक बंधू असून त्यांच्यामध्ये वाद सुरू आहे, असेही त्याने सांगितले.
यातून त्यांच्यातील कंपन्यांचे वाटप होणार असून, एका भावाच्या वाट्याला १११ कंपन्या येणार आहेत. या कंपन्यांचे काम मिळवून देतो, असे आमिष अक्रम याने दाखविले. परंतु या कंपन्यांच्या नोंदणी, जीएसटी तसेच इतर आधीचे खर्च सीएला करावे लागतील अशी त्यांची अट असल्याचे त्याने सांगितले. इतक्या मोठ्या प्रमाणात कंपन्यांचे काम मिळणार असल्याने सीएने देखील तयारी दर्शवली.
पैशाची मागणी एक कोटींच्या वर गेल्याने सीएने बँकेकडून कर्ज घेतले. सुमारे एक कोटी ६४ लाख रुपये अक्रम याला पाठविले. दिलेल्या मुदतीत त्याने काम न दिल्याने सीएने अक्रमकडे विचारणा केली असता, त्याने चेक पाठवून देतो, असे सांगितले. मात्र, चेक न पाठविल्याने सीएने पैशासाठी तगादा लावला असता त्याने थेट शिवीगाळ केला. यानंतर सीएने पोलिसात जाऊन तक्रार दाखल केली.
