विशेष योजनेपूर्वी मालमत्ताकराचा व्याजासह भरणा करणाऱ्या ग्राहकांना मिळाला मोठा दिलासा
अमरावती :- अमरावती महानगर पालिका क्षेत्रातील वर्ष २०२३-२०२४ मधील थकीत मालमत्ताकरधारकांना व्याजच्या रकमेतून सूट देण्यासंदर्भात महापालिकेने विशेष योजना सुरु केली आहे. अशातच योजनेपूर्वी ज्या मालमत्ताधारकांनी थकबाकीच्या एकूण रकमेचा एकमुस्त भरणा केला आहे. त्यांना पुढील वर्षी आकारण्यात येणाऱ्या करातून शास्तीची रक्कम (व्याज) कपात मिळणार आहे. आ.सौ. सुलभाताई खोडके यांनी मागील २ जानेवारी २०२५ रोजी महापालिकेतील बैठकीमध्ये केलेल्या सूचनेच्या अनुषंगाने मनपा आयुक्त सचिन कलंत्रे यांनी आता सर्व प्रक्रिया गतीने राबविण्यास सुरुवात केल्याने शहरातील मालमत्ताधारकांना मोठा दिलासा मिळाला आहे.
शासनाने अमरावती महापालिकेच्या वाढीव कर वसुलीला स्थगिती दिल्या नंतर जुनी कर प्रणाली नुसारच कर आकारणी व वसुली करण्याची कार्यवाही महापालिकेच्या वतीने सुरु आहे. मात्र मागील वर्षीच्या थकीत रक्कमेवर दरमहा २ टक्के व्याज आकारणी व वसुली होत असल्याने मालमत्ताधारकांना आर्थिक भुर्दंड सहन करावा लागत होता. या संदर्भात अमरावतीच्या आ.सौ. सुलभाताई संजय खोडके यांनी गेल्या ०२ जानेवारी २०२५ रोजी महापालिकेत बैठक घेऊन मालमत्ता कर आकारणी व वसुली प्रक्रियेबाबत मनपा आयुक्तांशी चर्चा केली. सन २०२३-२०२४ मध्ये मालमत्ताधारकांना कर भरण्यास पुरेसा कालावधी मिळाला नसल्याने त्यांना थकीत रकमेवरील व्याजाच्या रकमेत सूट देण्यात यावी, तसेच ज्यांनी व्याजाच्या रकमेसह थकीत कराचा भरणा केलेला आहे. त्यांचे व्याजाची रक्कम पुढील चालू वर्षी करिता आकारणी करण्यात येणाऱ्या बिलाच्या रकमेतून कमी करण्यात यावी. अशा सूचना आ.सौ.सुलभाताई खोडके यांनी बैठकीत केल्या होत्या. त्यानंतर मनपा आयुक्तांनी महाराष्ट्र महानगरपालिका अधिनियम, अनुसूचि “ड” प्रकरण ८ नियम ४१ अन्वये” महापालिका क्षेत्रातील लमत्ताधारकांना थकीत करावर आकारण्यात आलेल्या (व्याज ) शास्तीच्या रक्कमेमधून सुट देणेकरीता “विशेष योजना” राबविली. ज्यामध्ये दिनांक ०५ फेब्रुवारी २०२५ पासून ते दिनांक २८ फेब्रुवारी २०२५ पर्यंत मालमत्ता कराची चालू वर्षाची मागणी,व थकबाकीच्या एकूण रकमेचा एकमुस्त भरणा करणाऱ्या मालमत्ताधारकांना थकीत रकमेवरील व्याजातून १०० टक्के सूट लागू करण्यात आली आहे. या योजनेला शहरातील मालमत्ताधारकांचा अभूतपूर्व प्रतिसाद लाभला. त्यामुळे ग्राहकांनाही दिलासा मिळाला असून महापालिकेच्या उत्पनातही भर पडली आहे.
वर्ष २०२३-२०२४ च्या थकीत मालमत्ताधारकांना करावरील व्याजातून सवलत देण्याचा प्रयत्न होत असतांना शहरातील अनेक ग्राहकांनी या विशेष योजनेच्या पूर्वीच मालमत्ताकराचा व्याजासह भरणा केला आहे. अशा शेकडो मालमत्ताधारकांना दिलासा मिळावा म्हणून पुढील चालू वर्षीची कर आकारणी करतांना त्यांनी वर्ष २०२३-२४ च्या थकीत करापोटी भरलेली व्याजाची रक्कम ही पुढील वर्षीच्या बिलाच्या रकमेतून कमी करण्याबाबत सुद्धा अमरावती महानगरपालिकेने कार्यवाही आरंभिली आहे. या संदर्भात मनपा आयुक्त सचिन कलंत्रे यांनी कर मूल्यांकन विभागाशी संबंधित सर्व अधिकारी, झोन अधिकारी यांची बैठक घेऊन मनपाच्या विशेष योजनेपूर्वी वर्ष २०२३-२४ चा थकीत मालमत्ताकराचा व्याजासह भरणा करणाऱ्या ग्राहकांना पुढील वर्षी आकारण्यात येणाऱ्या करातून शास्तीची रक्कम (व्याज) कपात करण्याबाबत सूचना निर्गमित करून याबाबत नियोजन करण्याचे आदेशित करण्यात आले. या बद्दल आ.सौ. सुलभाताई खोडके यांनी मनपा आयुक्त सचिन कलंत्रे यांचे आभार मानीत अभिनंदन केले आहे.
