१३ वर्षीय विद्यार्थीनीचं शाळेच्या वसतिगृहात टोकाचं पाऊल
नंदुरबार :- शहादा तालुक्यातील मोहिदा येथील एकलव्य मॉडेल स्कूलमध्ये आठवीत शिकणाऱ्या एका तेरा वर्षीय मुलीने गळफास घेऊन आत्महत्या केल्याची घटना घडली आहे. घटनेनंतर संतप्त नातेवाईकांनी शाळा व्यवस्थापनावर विविध आरोप करत संबंधितांवर कारवाई करत नाही तोपर्यंत मुलीचा मृतदेह ताब्यात घेणार नाही असा पवित्रा उचलला. त्यामुळे घटनेनंतर परिसरातील वातावरण तापले होते.
१३ वर्षीय विद्यार्थीनीची शाळेतच आत्महत्या
आदिवासी विकास विभागाच्या नंदुरबार जिल्ह्यातल्या शहादा तालुक्यातील मोहिदा येथील एकलव्य मॉडेल स्कूलच्या इयत्ता आठवीत शिकणाऱ्या एका १३ वर्षीय मुलीने गळफास घेऊन आत्महत्या केली आहे. शाळेच्या इमारतीचे काम सुरु असल्याने सध्या ही शाळा शहादा तालुक्यातील सुलतानपूर येथील आश्रमशाळेच्या आवारातच भरत होती. याठिकाणी मुलीच्या वसतीगृहातील एका खोलीत उषा वसावे या मुलीने एका हुकाला स्वत:ला लटकवून घेत आत्महत्या केली आहे.
वसतीगृहातील खोलीत संपवलं आयुष्य
मृत विद्यार्थीनी उषा लहरे वसावे (१३) ही धडगाव तालुक्यातील अट्टी या गावची मूळ रहिवाशी होती. सकाळी तिच्या मैत्रीणींनी रुम उघडल्यानंतर हा प्रकार समोर आला आहे. दरम्यान या घटनेनंतर पालकांनी संताप व्यक्त करत आश्रमशाळेच्या परिसरातच हंबरडा फोडत आक्रोश व्यक्त केला. घटनेनंतर शहाद्याचे भाजपा आमदार राजेश पाडवी, पोलीस प्रशासन आणि आदिवासी विकास विभागाचे अधिकारी आश्रमशाळेवर दाखल झाले.
मुलीच्या आत्महत्येचे कारण अद्यापही अस्पष्ट असले, तरी या घटनेप्रकरणी तीन सदस्यीय चौकशी समिती नेमण्याची मागणी आमदार राजेश पाडवी यांनी केली आहे. तसंच जोपर्यंत यातील दोषी वार्डन, मुख्याध्यापक आणि संबंधीतांवर कारवाई केली जात नाही, तोपर्यंत मुलीचा मृतदेह घटनास्थळावरुन नेणार नसल्याची भूमिका पालक आणि नातेवाईकांनी घेतली होती. तर या प्रकरणी तीन सदस्यीय समिती गठीत करण्याचं आश्वासन प्रकल्प अधिकारी चंद्रकांत पवार देत आहे. दरम्यान पालकांनी मुलीच्या या आत्महत्येच्या घटनेवर संशय निर्माण केला आहे. लेकीच्या आत्महत्येनंतर पालकांनी शाळा प्रशासनावर गंभीर आरोप केले आहे.
