अमरावती: महानगरपालिकेची मोठी कारवाई – ३० पेक्षा जास्त गटई स्टॉल आणि खोके हटवले!

अमरावती :- अमरावती महानगरपालिकेच्या अतिक्रमण निर्मूलन विभागाने आज मोठी कारवाई केली आहे! सार्वजनिक फूटपाथ आणि नाल्यांवर अनधिकृतरीत्या उभारलेले ३० पेक्षा जास्त गटई स्टॉल्स आणि लोखंडी खोके हटवण्यात आले आहेत. या कारवाईमुळे रहदारीला मोठा दिलासा मिळणार आहे.

पाहूया संपूर्ण वृत्त…

पंचवटी चौक ते गाडगे नगर, गाडगे नगर ते शेगाव नाका, आणि शेगाव नाका ते कठोरा नाका या मुख्य रस्त्यांवर नागरिकांनी सार्वजनिक फूटपाथ आणि नाल्यांवर अनधिकृतरित्या स्टॉल्स उभारले होते. सामाजिक न्याय विभागाचे नाव वापरून गटई स्टॉल्स, लोखंडी खोके लावले जात होते.शासनाच्या अटी-शर्तीचे पालन न करता भाजीपाला विक्री, हॉटेल्स, टू-व्हीलर दुरुस्ती गॅरेज, मास विक्री, आणि पानठेले चालवले जात होते.

काही ठिकाणी तर हुबेहुब डुप्लिकेट खोके लावून व्यापाऱ्यांनी अनधिकृत व्यवसाय सुरू केला होता! मनपा आयुक्त आणि उपायुक्त प्रशासनाच्या आदेशाने ही कारवाई करण्यात आली. ०७ मार्च २०२५ रोजी सकाळी ११:०० ते दुपारी ४:३० या वेळेत जे.सी.बी.च्या मदतीने अनधिकृत अतिक्रमण हटवण्यात आले.सुमारे ३० ते ३५ गटई स्टॉल्स आणि खोके जप्त करण्यात आले. अतिक्रमणामुळे होणाऱ्या वाहतूक कोंडीला आळा बसणार असल्याने नागरिकांनी समाधान व्यक्त केले! यावेळी समाजकल्याण विभागाचे निरीक्षक श्री. ऋषिकेश तायडे, अतिक्रमण निर्मूलन पथक प्रमुख श्री. योगेश कोल्हे, निरीक्षक अन्सार अहमद, शुभम पांडे, पोलीस कर्मचारी आणि महानगरपालिका अतिक्रमण विभागाचे कर्मचारीही कारवाईदरम्यान उपस्थित होते.

ही कारवाई भविष्यातही सुरूच राहणार आहे! शासनाच्या नियमांचे पालन न करणाऱ्या सर्व अतिक्रमणधारकांवर कठोर कारवाई केली जाईल! सार्वजनिक फूटपाथ आणि रस्ते नागरिकांसाठी मोकळे ठेवण्याचे आदेश मनपाच्या वतीने यावेळी देण्यात आले. कुणीही अनधिकृतरीत्या स्टॉल्स उभारल्यास त्यावर लगेच मनपाची कठोर कारवाई होणार!

महानगरपालिका आणि समाजकल्याण विभागाच्या संयुक्त कारवाईने अमरावतीतील मुख्य रस्त्यांवरील मोठ्या अतिक्रमणाचा निकाल लावला आहे!