अमरावती :- आंतरराष्ट्रीय महिला दिनानिमित्त अमरावतीमध्ये भव्य वॉकथॉन चे आयोजन करण्यात आले. यामध्ये महिलांचा उत्स्फूर्त सहभाग दिसून आला. तसेच, विविध क्षेत्रात उल्लेखनीय योगदान देणाऱ्या महिलांचा जिल्हा प्रशासनाच्या वतीने सन्मान करण्यात आला.
चला पाहूया या विशेष कार्यक्रमाचा संपूर्ण आढावा!
आंतरराष्ट्रीय महिला दिनानिमित्त अमरावती जिल्हा प्रशासनाच्या वतीने वॉकथॉनचे आयोजन करण्यात आले. विभागीय क्रीडा संकुलात पार पडलेल्या या भव्य सोहळ्यास जिल्हाधिकारी सौरभ कटियार, मुख्य कार्यकारी अधिकारी संजिता महापात्र, डॉ. मोनिका कटियार, विभागीय महिला बालकल्याण अधिकारी विलास मसराळे, जिल्हा शल्यचिकित्सक डॉ. दिलीप सौंदळे, जिल्हा कार्यक्रम अधिकारी सुनील सोसे आणि अनेक मान्यवर उपस्थित होते.
महिला दिनानिमित्त शुभेच्छा देत मान्यवरांनी वॉकथॉनला हिरवी झेंडी दाखवली. वॉकथॉनची सुरुवात विभागीय क्रीडा संकुलातून झाली आणि इर्विन चौक, मदर टेरेसा मार्ग, गर्ल्स हायस्कूल चौक, शिवाजीनगर मार्गे पुन्हा क्रीडा संकुल येथे या रॅलीचा समारोप झाला. या वॉकथॉनमधून महिला सुरक्षा आणि स्त्री-पुरुष समानता याबाबत जनजागृती करण्यात आली. विशेष म्हणजे, परिचर्या प्रशिक्षण महाविद्यालयाच्या विद्यार्थिनींनी पथनाट्य सादर करून महिलांच्या हक्कांवर भाष्य केले.
मुख्य कार्यकारी अधिकारी संजिता महापात्र यांनी इर्विन चौकातील डॉ. बाबासाहेब आंबेडकर यांच्या पुतळ्याला पुष्पहार अर्पण करून अभिवादन केले. यानंतर, विविध क्षेत्रात उत्कृष्ट योगदान देणाऱ्या महिलांचा विशेष सत्कार करण्यात आला. यामध्ये सुप्रिया गजभिये, सुषमा वानखडे, प्रणिता तागडे, सीमा कोरडे, शामू दारसिंबे, सरिता किल्लेदार, निकिता पवार, जयश्री मानकर, वर्षा वानखडे, नीलाक्षी दर्यापूरकर, मनीषा टवलारे, स्वामिनी तायडे, ईश्वरी गांजरे, मनोरमा गायकवाड, रेणूका सपाटे आणि छाया काळमेघ यांचा समावेश होता.
महिला दिनानिमित्त झालेल्या या भव्य वॉकथॉन आणि सन्मान सोहळ्याने महिलांच्या सशक्तीकरणाचा संदेश दिला आहे. महिलांचा सन्मान आणि त्यांच्या योगदानाची दखल घेणे ही समाजाची जबाबदारी आहे. अशाच नव्या घडामोडींसाठी आम्ही पुन्हा भेटू. तोपर्यंत, आपली काळजी घ्या आणि महिला सशक्तीकरणाचा जागर करत राहा!
