अमरावती :- अमरावतीत पाणीटंचाईचा प्रश्न गंभीर बनला आहे. शहराची पाण्याची मागणी 252 एमएलडी आहे, मात्र सध्या केवळ 130 एमएलडी पाणीपुरवठा केला जात आहे. जिर्ण झालेल्या पाइपलाइन आणि पाण्याच्या कमतरतेमुळे प्रशासनाने कठोर निर्णय घेतला आहे. आता शहरात तीन दिवसांनंतर पाणीपुरवठा होणार आहे. चला, जाणून घेऊया या पाणीटंचाईमागील संपूर्ण वास्तव!
अमरावती शहर पाणीटंचाईच्या गर्तेत सापडले आहे. मागणीप्रमाणे पाणी उपलब्ध नसल्यानं आता तीन दिवसांनी एकदा पाणीपुरवठा करण्याचा निर्णय घेतला गेला आहे. शहराची एकूण मागणी 252 एमएलडी आहे, मात्र उपलब्ध पाणी केवळ 130 एमएलडी इतकंच आहे.
बडनेरा भागात परिस्थिती आणखी गंभीर असून तिथं पाच दिवसांतून एकदाच पाणीपुरवठा होणार आहे. जुन्या आणि गंजलेल्या पाइपलाइनमुळे अधिक पाणीपुरवठा करणं धोकादायक ठरू शकतं. पाइपलाइन लीक होण्याचा मोठा धोका असल्याने दुरुस्ती आणि नव्या पाइपलाइनसाठी किमान दोन वर्षे लागू शकतात.
या निर्णयामुळे नागरिकांमध्ये संतापाची लाट उसळली आहे. महानगर पालिका आणि महाराष्ट्र जीवन प्राधिकरण (MJP) यांच्यावर निष्क्रियतेचे आरोप होत आहेत. नागरिकांनी प्रशासनाकडे त्वरित उपाययोजनांची मागणी केली आहे. प्रशासनाने नागरिकांना पाणी जपून वापरण्याचं आवाहन केलं आहे. याशिवाय, पाणीटंचाई कमी करण्यासाठी लवकरच दुरुस्तीच्या कामांना गती देण्यात येणार असल्याचं आश्वासनही देण्यात आलं आहे.
अमरावतीतील पाणीटंचाई ही प्रशासनाच्या अपयशाची जाणीव करून देणारी आहे. आता नागरिकांनीही पाणी जपून वापरणं आणि जलसंवर्धनासाठी पुढाकार घेणं गरजेचं आहे. सिटी न्यूज तुमच्यासाठी या विषयावर सतत लक्ष ठेवून राहणार आहे. पुढील अपडेटसाठी पाहत राहा सिटी न्यूज.
