कळमना परिसरात भीषण आग | कबाडी गोडाऊन जळून खाक | नागरिकांमध्ये भीती
नागपूर :- नागपूरच्या कळमना नाका नंबर 4 परिसरात रात्रीच्या सुमारास कबाडी गोडाऊनला भीषण आग लागली. आगीने रौद्र रूप धारण केल्यामुळे इतर घरांनाही झळ पोहोचली. स्थानिक नागरिकांमध्ये भीतीचे वातावरण पसरले आहे.
पाहूया संपूर्ण रिपोर्ट :
26 मार्चच्या रात्री साधारण 11 वाजताच्या सुमारास नागपूरमधील कळमना नाका नंबर 4 परिसरातील कबाडी गोडाऊनला भीषण आग लागली. ही आग इतकी भयंकर होती की काही वेळातच तिने रौद्र रूप धारण केलं आणि आजूबाजूच्या घरांनाही आपल्या विळख्यात घेतलं.
स्थानिक नागरिक घाबरून घराबाहेर पळाले. नागरिकांनी त्वरित अग्निशमन दलाला पाचारण केलं. काही वेळातच अग्निशमन दलाच्या गाड्या घटनास्थळी दाखल झाल्या आणि अथक प्रयत्नांनंतर आगीवर नियंत्रण मिळवण्यात यश आलं. मात्र, या आगीमुळे साहू यांच्या कबाडी गोडाऊनसह अनेकांचं मोठं नुकसान झालं आहे.
स्थानीय नागरिकांनी सांगितलं की कळमना परिसरात मोठ्या प्रमाणात अवैध कारखाने आणि कबाडी गोडाऊन चालवले जातात, जे कोणत्याही सुरक्षाविषयक नियमांचे पालन करत नाहीत. त्यामुळे अशा दुर्घटना वारंवार घडतात.
27 मार्च रोजी स्थानिक रहिवाशांनी कळमना पोलीस स्टेशन गाठून या घटनेच्या विरोधात निवेदन दिलं. त्यांनी नुकसानग्रस्तांना भरपाई देण्याची मागणी केली, तसेच परिसरातील अवैध कारखान्यांवर कठोर कारवाई करण्याची मागणी केली. कळमना पोलीस निरीक्षक प्रवीण काळे यांनी रहिवाशांना आश्वासन दिलं की चौकशी करून दोषींवर योग्य ती कारवाई केली जाईल.
कळमना परिसरातील ही आग केवळ एक अपघात नव्हता, तर प्रशासनाच्या दुर्लक्षाचं प्रतीक आहे. नागरिकांच्या सुरक्षेसाठी कळमना परिसरातील अवैध कारखान्यांवर कडक कारवाई होणार का? की पुन्हा अशा दुर्घटना घडत राहतील? यावर संपूर्ण शहराचं लक्ष लागलं आहे. पुढील अपडेट्ससाठी पाहत राहा City News.
