झुलेलाल साईंची जयंती उत्साहात साजरी; भव्य शोभायात्रा व सांस्कृतिक कार्यक्रमांचा जल्लोष

अमरावती : दरवर्षीप्रमाणे यंदाही सिंधी समाजाचे दैवत झुलेलाल साईंची जयंती मोठ्या उत्साहात साजरी करण्यात आली. 23 मार्च ते 30 मार्च या कालावधीत विविध सांस्कृतिक व धार्मिक कार्यक्रमांचे आयोजन करण्यात आले होते. 31 मार्च रोजी शिव मंदिर, रामपुरी कॅम्प येथे महाप्रसादाचे आयोजन करण्यात आले होते. संपूर्ण सिंधी समाजाने आपल्या व्यवसायातून वेळ काढून भव्य शोभायात्रेत सहभाग घेतला.

शोभायात्रेचा मार्ग आणि स्वागत स्टॉल्स

30 मार्च रोजी भव्य शोभायात्रा नेहरू मैदान, जैस्तंभ चौक, राजकमल चौक, श्याम चौक, सरोज चौक, जवाहर रोड, आदर्श हॉटेल, राम लक्ष्मण संकुल, रामपुरी कॅम्प, मिठू चक्की चौक, कृष्णानगर, नानकर आणि नाननगर या मार्गावरून निघाली. मिरवणुकीच्या मार्गावर विविध ठिकाणी स्वागत स्टॉल्स उभारण्यात आले होते. या स्टॉल्सवर श्रद्धाळूंना शरबत आणि प्रसाद वाटण्यात आला.

उत्सवाची विशेष आकर्षणं

शोभायात्रेत बँड, ढोल, ताशे, नाद, घोडे, बग्गी, रोषणाई, ट्रॅक्टर आणि पारंपारिक झांकी यांचा समावेश होता. विशेषतः झुलेलाल साईंची बहिराणा साहिब झांकी सर्वांचे आकर्षण ठरली. या झांकीमध्ये अखंड ज्योत प्रज्वलित करण्यात आली होती. शोभायात्रेत भगवान शंकर आणि अघोरी तांडव नृत्याच्या झलकांनी उपस्थितांची मने जिंकली.

धार्मिक विधी आणि परंपरा

झुलेलाल साई हे भगवान वरुणदेवाचा अवतार मानले जात असल्यामुळे या दिवशी सिंधी समाजातील प्रत्येक घरात जलदेवतेची पूजा केली जाते. दुपारी 12 वाजता शिवमंदिर रामपुरी कॅम्प येथे बहिराणा साहिबच्या झांकीचे पूजन करून झुलेलाल साईंच्या प्रतिमेसमोर दीपप्रज्वलन करण्यात आले. मिरवणुकीच्या समारोपानंतर अखंड ज्योत पाण्यात विसर्जित करण्यात आली. यावेळी पल्लवांची पूजा (पिशवी पसरून प्रार्थना) करण्यात आली.

या कार्यक्रमात सिंधी समाजासह सर्व हिंदू समाज मोठ्या संख्येने सहभागी झाला. उत्सवाचे हे भव्य स्वरूप पाहून शहरभर उत्साहाचे वातावरण होते.