मुख्यमंत्री देवेंद्र फडणवीस यांच्या हस्ते महाबळेश्वर पर्यटन महोत्सव लोगोचे अनावरण

मुंबई :- महाराष्ट्र शासनाच्या पर्यटन विभागांतर्गत महाराष्ट्र पर्यटन विकास महामंडळ (MTDC) आणि स्थानिक जिल्हा प्रशासन यांच्या संयुक्त विद्यमाने २ ते ४ मे २०२५ या कालावधीत महाबळेश्वर पर्यटन महोत्सवाचे आयोजन करण्यात आले आहे. यासाठी मुख्यमंत्री देवेंद्र फडणवीस यांच्या हस्ते महोत्सवाच्या लोगोचे अनावरण आज सह्याद्री अतिथीगृह, मुंबई येथे करण्यात आले.

यावेळी उपमुख्यमंत्री एकनाथ शिंदे, अजित पवार, पर्यटन मंत्री शंभूराज देसाई, महसूल मंत्री चंद्रशेखर बावनकुळे, जलसंपदा मंत्री गिरीश महाजन, तसेच महाराष्ट्र शासनाचे उच्चपदस्थ अधिकारी उपस्थित होते.

महाबळेश्वर पर्यटन महोत्सवाचे वैशिष्ट्ये

• स्थळ: महाबळेश्वर, सातारा
• कालावधी: २ ते ४ मे २०२५
• उद्घाटन: मुख्यमंत्री देवेंद्र फडणवीस यांच्या हस्ते

महोत्सवाचा उद्देश

महाबळेश्वर पर्यटन महोत्सवाचा मुख्य हेतू म्हणजे स्थानिक पर्यटन, सांस्कृतिक वारसा, स्थानिक खाद्यसंस्कृती आणि कृषी पर्यटनाला चालना देणे. पर्यटकांसाठी स्थानिक कलावंतांचे कार्यक्रम, स्ट्रॉबेरी आणि कृषी पर्यटन महोत्सव, तसेच महाबळेश्वर परिसरातील विविध प्रेक्षणीय स्थळे, किल्ले, निसर्गरम्य ठिकाणे आणि साहसी पर्यटनाच्या संधी उपलब्ध करून देण्याचा मानस आहे.

महोत्सवातील विशेष आकर्षण

• सांस्कृतिक कार्यक्रम: स्थानिक लोककलांचे सादरीकरण व नामांकित कलाकारांचे विशेष कार्यक्रम
• स्ट्रॉबेरी व कृषी पर्यटन महोत्सव: महाबळेश्वर प्रसिद्ध असलेल्या स्ट्रॉबेरीच्या विशेष प्रदर्शनासह कृषी पर्यटन
• निसर्ग पर्यटन: पाचगणी, कास पठार, कोयनानगर, तापोळा आणि इतर पर्यटक स्थळांची सफर
• साहसी पर्यटन:
• पॅराग्लायडिंग, पॅरामोटरिंग
• ट्रेकिंग, रॉक क्लायंबिंग
• घोडेस्वारी, जलक्रीडा
• हस्तकला आणि खाद्य महोत्सव: स्थानिक बचत गटांकडून हस्तकला वस्तू प्रदर्शन आणि विक्री
• विशेष पर्यटन दौरे: देशातील विविध राज्यांतील टूर ऑपरेटर्स, ट्रॅव्हल एजन्सीज आणि सोशल मीडिया प्रभावक यांच्यासाठी विशेष ओळख सहलीचे आयोजन

महाबळेश्वर – निसर्गाचा अनमोल खजिना

महाबळेश्वर हे सातारा जिल्ह्यातील पश्चिम घाटावर, समुद्रसपाटीपासून ४५०० फूट उंचीवर वसलेले एक प्रसिद्ध हिल स्टेशन आहे. पूर्वी हे ब्रिटिश राजवटीतील बॉम्बे प्रेसीडेन्सीचे उन्हाळी राजधानीचे ठिकाण होते. येथील हिरवाई, धबधबे, घनदाट जंगल, प्राचीन मंदिरे, आणि भव्य कॅस्केड पर्यटकांना भुरळ घालतात.

• पर्यटकांसाठी विशेष सुविधा
• विविध श्रेणींतील निवास व्यवस्था
• ५० निवासी टेंट्सची व्यवस्था
• स्थानिक खाद्यसंस्कृतीचा अनुभव
• भव्य सांस्कृतिक कार्यक्रम व बाजारपेठ भ्रमंती

पर्यटन उद्योगाच्या वाढीस चालना

महाबळेश्वर पर्यटन महोत्सवाच्या निमित्ताने पर्यटन उद्योगातील भागधारक, ट्रॅव्हल एजन्सी प्रतिनिधी, टूर ऑपरेटर, व्यावसायिक आणि सोशल मीडिया प्रभावक यांना एकत्र आणले जाईल. महोत्सवादरम्यान पर्यटन क्षेत्राशी संबंधित परिसंवाद आणि चर्चा सत्रांचे आयोजन करण्यात येणार आहे.