Pune Murder : अनैतिक संबंधांचा संशय, पुण्यात २२ वर्षीय तरुणाचा जीव घेतला, ४२ वर्षीय शेजारी पसार
पुणे : अनैतिक संबंधांच्या संशयातून पुण्यात एका २२ वर्षीय तरुणाची निर्घृण हत्या करण्यात आली. कोयत्याने वार करून त्याचा जीव घेण्यात आला. मंगळवारी रात्री ७:४५ च्या सुमारास ही धक्कादायक घटना घडल्याचे समोर आले आहे. पुणे जिल्ह्यात मावळ तालुक्यातील कान्हे गावातील आंबेवाडी येथील शनि मंदिराजवळ हा प्रकार घडला आहे. या हत्येने संपूर्ण मावळ तालुका हादरला असून परिसरात खळबळ उडाली आहे.
वैभव उमेश सातकर (वय २२, रा. आंबेवाडी, कान्हे) असे मृत तरुणाचे नाव आहे. तर अंकुश जयवंत सातकर (वय ४२, रा. आंबेवाडी, कान्हे) याने हत्या केल्याचा आरोप आहे.
काय आहे प्रकरण?
याबाबत पोलिसांनी दिलेल्या माहितीनुसार, मयत वैभव आणि आरोपी अंकुश हे शेजारी राहत होते. वैभव याचे अनैतिक संबंध असल्याचा संशय अंकुश याला होता. याच रागातून त्याने वैभवच्या मानेवर कोयत्याने वार केले, यामध्ये वैभवचा जागीच मृत्यू झाला.
घटनेची माहिती मिळताच वडगाव मावळ पोलीस ठाण्याचे पोलीस निरीक्षक कुमार कदम, सहाय्यक पोलीस निरीक्षक शितलकुमार डोईजड, पोलीस उपनिरीक्षक ऋतुजा मोहिते आणि पोलीस पथकाने घटनास्थळी धाव घेतली. मृतदेहाचा पंचनामा करून तो शवविच्छेदनासाठी पाठवण्यात आला आहे. या प्रकरणाचा पुढील तपास वडगाव मावळ पोलीस करत आहेत.
या घटनेने मावळ तालुक्यात एकच खळबळ उडाली आहे. दिवसेंदिवस गुन्हेगारी वाढतच चालल्याचे पाहायला मिळत आहे. अनेक गुन्हेगारीच्या घटना समोर येत असून या घटना रोखण्याचे पोलिसांसमोर आव्हान असणार आहे.
