AMC Amravati : शहरातील अस्वच्छतेवर मनपाची विशेष मोहीम, कचरा टाकणाऱ्यांवर कारवाई आणि दंड वसुली
अमरावती :- शहरातील स्वच्छता कायम राखण्यासाठी अमरावती महानगरपालिकेने विशेष मोहीम राबवण्यास सुरुवात केली आहे. सार्वजनिक ठिकाणी कचरा टाकणाऱ्या नागरिकांवर कारवाई करून त्यांच्याकडून दंड वसूल करण्याचा निर्णय प्रशासनाने घेतला आहे. महानगरपालिकेच्या स्वच्छता विभागाच्या वतीने ही मोहीम प्रभावीपणे राबवण्यात येत आहे.
महानगरपालिकेची कठोर भूमिका
शहरात अनेक ठिकाणी नागरिकांच्या दुर्लक्षामुळे मोठ्या प्रमाणात कचरा साचत आहे. त्यामुळे नागरिकांना विविध आजारांचा सामना करावा लागत आहे. या पार्श्वभूमीवर महानगरपालिकेच्या उपायुक्त डॉ. मेघना वासनकर यांनी स्वच्छता विभागाला कचरा टाकणाऱ्यांवर कठोर कारवाई करण्याचे आदेश दिले आहेत. आदेशानुसार शहरातील विविध भागांमध्ये सफाई कर्मचार्‍यांच्या पथकांद्वारे नियमित गस्त घालून कारवाई सुरू आहे.
दंडाची तरतूदमहानगरपालिकेने नागरिकांमध्ये जनजागृती मोहिमेसह कचरा टाकणाऱ्यांविरोधात दंडात्मक कारवाईही सुरू केली आहे. नियमांचे उल्लंघन करणाऱ्या नागरिकांकडून ५०० रुपये ते ५,००० रुपये पर्यंत दंड वसूल करण्यात येत आहे.
शहरभरात स्वच्छता मोहिमेचा अंमल
- महानगरपालिकेने शहरातील विविध झोन आणि प्रभागांमध्ये स्वच्छता मोहीम हाती घेतली आहे.
- पूर्व झोन क्र. ३ दस्तूरनगर प्रभाग क्र. १० बेनोडा दस्तूरनगर येथे वडरपुरा परिसरात धुवारणी करण्यात आली.
- प्रभाग क्र. ११ फेजरपुरा भागातील भीमज्योत मंडळ परिसरात फवारणी करण्यात आली.
- प्रभाग क्र. १३ अंबापेठ परिसरात सहाय्यक आयुक्त भूषण पुसतकर यांनी स्वच्छतेची पाहणी करून आवश्यक निर्देश दिले. तसेच राजापेठ चौक उड्डाण पुलाखालील कचरा त्वरित उचलण्याचे आदेश दिले.
- उत्तर झोन क्र. १ कृष्‍णनगर अंतर्गत प्रभाग क्र. ६ विलास नगर आणि मोरबाग येथे सर्व कार्यालये, शाळा आणि संपूर्ण परिसराची स्वच्छता करण्यात आली.
- झोन क्र. ४ प्रभाग क्र. २१ जुनीवस्ती बडनेरा आणि प्रभाग क्र. २० सूतगिरणी मार्केट परिसरात घंटागाडीद्वारे कचरा संकलन करण्यात आले.
यापुढेही मोहिम सुरूच राहणार
महानगरपालिकेच्या वतीने पुढील काही दिवस ही स्वच्छता मोहीम सुरू राहणार आहे. प्रशासनाच्या या कठोर पावलांमुळे शहरातील स्वच्छता सुधारण्यास मदत होणार आहे. नागरिकांनी सहकार्य करून शहर स्वच्छ ठेवण्यास हातभार लावावा, असे आवाहन प्रशासनाने केले आहे.
