Waqf Bill: वक्फ बिलाचा भाजपच्या मित्रपक्षाला झटका, ५ नेत्यांनी पक्षाची साथ सोडली,अनेक जण राजीनामा देणार

पाटणा: संसदेत वक्फ संशोधन विधेयक मंजूर झाल्यावर एनडीएतील मुख्य घटक पक्ष असलेल्या जेडीयू मध्ये राजीनामा सत्र सुरू झाले आहे. नितीश कुमार यांच्या नेतृत्वाखालील जेडीयू पक्षातील मुस्लिम नेते नाराज आहेत. या विधेयकाला जेडीयू ने संसदेत पाठिंबा दिला, त्यामुळे नाराज होऊन काही नेत्यांनी मुख्यमंत्री नितीश कुमार यांच्यावर आरोप केले आहेत.

वक्फ संशोधन विधेयक मंजूर झाल्यावर, जवळपास पाच नेत्यांनी आपले राजीनामे दिले आहेत. नदीम अख्तर यांनी सर्वात आधी राजीनामा दिला. त्यानंतर जेडीयू नेते राजू नैयर, तबरेज सिद्दीकी अलीग, मोहम्मद शाहनवाज मलिक आणि मोहम्मद कासिम अंसारी यांनी सुद्धा राजीनामा दिला आहे.जेडीयू चे मुस्लिम नेते रणनीती बनवण्यात व्यस्त आहेत. जेडीयूच्या एका पदाधिकाऱ्याने नाव न सांगण्याच्या अटीवर माहिती दिली. ते म्हणाले, अल्पसंख्याक कक्षाची बैठक शुक्रवारी होणार होती. पण ती रद्द करण्यात आली. कारण बैठकीत काही गोष्टी उघड होण्याची भीती होती. मीडिया रिपोर्टनुसार, जेडीयू चे काही मोठे मुस्लिम नेते लवकरच मोठी घोषणा करू शकतात.

संसदेतील वक्फ विधेयकाला जेडीयू ने पाठिंबा दिल्याने काही नेते नाराज झाले आहेत. नदीम, राजू आणि तबरेज यांनी शुक्रवारी राजीनामा दिला. शाहनवाज आणि मोहम्मद कासिम अंसारी यांनी गुरुवारी आपला राजीनामा सोपवला. राजू नैयर यांनी आपल्या राजीनाम्यात लिहिले आहे, ‘वक्फ संशोधन विधेयक लोकसभेत मंजूर झाले आणि त्याला पाठिंबा दिला गेला, त्यामुळे मी जेडीयू मधून राजीनामा देत आहे.’

काळ्या कायद्याच्या बाजूने मतदान
राजू नैयर यांनी पक्षाबद्दलची त्यांची निराशा व्यक्त केली. ते म्हणाले, ‘मुस्लिमांवर अन्याय करणाऱ्या या काळ्या कायद्याच्या बाजूने जेडीयू ने मतदान केल्याने मी खूप दुःखी आहे.’ ते पुढे म्हणाले, ‘मी जेडीयू च्या प्राथमिक सदस्यत्वाचा राजीनामा देत आहे. माननीय मुख्यमंत्री नितीश कुमार यांना पत्र लिहून मला सर्व जबाबदाऱ्यातून मुक्त करण्याची विनंती करतो.

शाहनवाज मलिक यांनी नितीश कुमार यांना पत्र लिहिले आहे. त्यात ते म्हणतात, ‘आमच्यासारख्या लाखो भारतीय मुस्लिमांचा असा विश्वास होता की, तुम्ही धर्मनिरपेक्ष विचारधारेसाठी उभे आहात. तो विश्वास आता तुटला आहे.’ याचा अर्थ, शाहनवाज मलिक यांना नितीश कुमार यांच्यावरचा विश्वास उडाला आहे.

नितीश कुमारांची मानसिक स्थिती ठीक नाही
दरम्यान, पूर्णियाचे अपक्ष खासदार पप्पू यादव यांनी एक मोठा दावा केला आहे. ते म्हणाले, बिहारचे मुख्यमंत्री आणि जेडीयू प्रमुख नितीश कुमार यांची मानसिक स्थिती ठीक नाही. त्यांचे आपल्या पक्षावर नियंत्रण नाही.

या सगळ्या घटनांमुळे जेडीयू मध्ये खळबळ माजली आहे. अनेक मुस्लिम नेते राजीनामा देत आहेत. नितीश कुमार यांच्या भूमिकेवर प्रश्नचिन्ह उभे केले जात आहेत. राजकीय वर्तुळात याबद्दल चर्चा सुरू आहे.