26/11 हल्ल्याचा सूत्रधार, तहव्वूर राणाच्या पापाचा घडा भरला; कोणत्याही क्षणी भारतात आणण्याची शक्यता
संपूर्ण देशाच्या सुरक्षा व्यवस्थेला सुरुंग लावत मुंबई, या देशाच्या आर्थिक राजधानीला हादरवणाऱ्या 26/11 हल्ल्याचा खरा सुत्रधार तहव्वूर राणा याला भारतात आणण्याला मार्ग मोकळा झाला असून, बुधवारी (9 एप्रिल 2024) रात्रीपर्यंत त्याला भारतात आणलं जाण्याची शक्यता असल्याचं म्हटलं जात आहे.
सूत्रांच्या माहितीनुसार राणाला भारतात आणण्यासाठी एनआयएची एक टीम अमेरिकेत पोहोचली असून प्रत्यार्पणासाठीच्या सर्व कायदेशीर प्रक्रिया पूर्ण झाल्या आहेत. त्यामुळं तहव्वूर राणाला कधीही भारतात आणता येईल, मात्र त्याला दिल्लीला आणलं जाईल की मुंबईत हे अद्याप स्पष्ट होऊ शकलेलं नाही.
काही माध्यमांनी प्रसिद्ध केलेल्या वृत्तांनुसार दिल्ली आणि मुंबईमधील कारागृह तहव्वूर राणाच्या शिक्षेसाठी सज्ज असून अमेरिकेतील न्यायव्यवस्थेच्या शिफारसींनुसार इथं तरतुदी करण्यात येतील असं म्हटलं जात आहे. सुरुवातीचे काही दिवस राणाची रवानही एनआयएच्या कोठडीत होणार असून यासंदर्भातील सर्व लहानमोठ्या घडामोडींवर खुद्द केंद्रीय गृहमंत्री अमित शाह आणि राष्ट्रीय सुरक्षा सल्लागार अजित डोभाल यांच्यासह त्यांच्याअंतर्गत कार्यरत असणारे अधिकारी करडी नजर ठेवणार आहेत.
मुंबई हल्ल्यांचा सूत्रधार राणा इतका क्रूर…
कॅनडा- पाकिस्तानचं नागरिकत्वं असणारा तहव्वूर राणा लष्कर-ए-तोयबाचा या दहशतवादी संघटनेसाठी काम करत असून, त्यानं डेविड हेडली (दाऊद गिलानी या नावानं ओळख) याला पासपोर्ट तयार करून देण्यात मदत केली होती. हा तोच हेडली, ज्यानं कटकारस्थानं रचत भारतात दाखल होत मुंबईतील हल्ल्याचं षडयंत्र रचलं. लष्कर आणि पाकिस्तानची गुप्तचर यंत्रणा आयएसआय यांनी एकत्र येत मुंबईवर हा भ्याड हल्ला केल्याचे पुरावे तपासातून समोर आले असून, राणानं 26 नोव्हेंबर 2008 मधील हल्ल्यात मृत पावलेल्यांच्या वृत्तावर आनंद व्यक्त करत या क्रूरकर्म्यानं या हल्ल्यातील दहशतवाद्यांना पाकिस्तानचा मरणोत्तर दिला जाणारा सर्वोच्च सैन्य पुरस्कार देण्याय यावा अशी गरळ ओकली होती.
भारत सरकराच्या वतीनं राणाला भारतात आणण्यासाठी सातत्यानं प्रयत्न केले असून, डिसेंबर 2019 मध्ये भारताच्या वतीनं त्याच्या प्रत्यार्पणासाठी अमेरिकेला एय राजकीय संदेश पाठवला होता. 10 जून 2020 मध्ये त्याच्या अस्थायी अटकेसाठी एक औपचारिक तक्रारसुद्धा दाखल केली होती.26/11 हल्ल्याचा सूत्रधार, तहव्वूर राणाच्या पापाचा घडा भरला; कोणत्याही क्षणी भारतात आणण्याची शक्यता
