प्रेमासाठी पळून गेली म्हणून बापानेच केली 25 वर्षीय साक्षीची हत्या
प्रियकरासोबत पळून गेली म्हणून जन्मदात्या बापानेच पोटच्या मुलीची हत्या केल्याची धक्कादायक घटना समोर आली आहे. मुलगी प्रियकरासोबत दिल्लीला पळून गेली होती. पोलिसांनी दिलेल्या माहितीनुसार, आरोपी बापाला अटक करण्यात आली आहे. पीडित मुलीचं नाव साक्षी असून ती 25 वर्षांची आहे. 7 एप्रिलला तिची हत्या करण्यात आली. घरातील बंद करण्यात आलेल्या बाथरुममध्ये तिचा मृतदेह आढळला.
आरोपी मुकेश सिंग मुलीच्या प्रियकराला मारण्यासाठी त्याच्या मागे गेला होता, परंतु तो गावात नव्हता. साक्षीचा मामा विपीन कुमार यांनी सांगितलं आहे की, ती 4 मार्च रोजी तिच्या प्रियकरासह दिल्लीला पळून गेली होती, जो दुसऱ्या जातीचा होता आणि तिच्या घराजवळ राहत होता. दोघंही एकत्र कॉलेजला जात होते, असं विपीन कुमार यांनी सांगितलं.
आरोपी मुकेश सिंग माजी सैनिक असल्याचं सांगितलं जात आहे. एक आठवड्यापूर्वी त्याने मुलीला राजधानी दिल्लीतून समस्तीपूरला परत येण्यासाठी तयार केलं होतं. त्यानंतर काही दिवसांनी ती गायब झाली.
मुलीच्या आईने मुकेश सिंगला मुलीबाबच विचारणा केली. त्यावर त्याने ती पुन्हा घराबाहेर पडली असल्याचं सांगितलं. तथापि, नंतर तिला संशय आला आणि तिने पोलिसांना कळवलं. त्यानंतर पोलिसांनी तपास सुरू केला आणि त्यांच्या निवासस्थानी असलेल्या बंद बाथरूममधून दुर्गंधी येत असल्याचं लक्षात आले. त्यानंतर त्यांना तिचा मृतदेह आढळला. पोलिसांनी सिंगची चौकशी केली तेव्हा त्याने गुन्ह्याची कबुली दिली.
