भारतरत्न पंजाबराव देशमुख? अमरावतीतून झाली एकमुखी मागणी, बावनकुळे यांचा मोठा शब्द
अमरावती : स्वतंत्र भारताचे पहिले कृषिमंत्री, भारतीय संविधानाचे शिल्पकार, श्री शिवाजी शिक्षण संस्थेचे संस्थापक, शेतकऱ्यांचे कैवारी आणि शिक्षण प्रसाराचे युगपुरुष डॉ. पंजाबराव देशमुख यांच्या ६० व्या पुण्यतिथीनिमित्त आज अमरावती येथील शिवाजी शिक्षण संस्थेत एक खास स्मरण कार्यक्रम पार पडला.
या कार्यक्रमाला राज्याचे महसूलमंत्री चंद्रशेखर बावनकुळे, राज्यमंत्री पंकज भोयर, खासदार बळवंत वानखडे, अनिल बोडे यांच्यासह अनेक मान्यवर उपस्थित होते. सर्वांनी डॉ. पंजाबराव देशमुख यांच्या पुतळ्याला पुष्पांजली अर्पण करून त्यांच्या कार्याला अभिवादन केले. यावेळी प्रा. आठवले यांनी लिहिलेल्या ‘भारतीय संविधान आणि डॉ. पंजाबराव देशमुख’ या पुस्तकाचे प्रकाशनही करण्यात आले.
मात्र, या कार्यक्रमाचे सर्वात महत्त्वाचे वैशिष्ट्य ठरले ते म्हणजे डॉ. पंजाबराव देशमुख यांना भारतरत्न पुरस्काराने सन्मानित करण्याची एकमुखी मागणी. ही मागणी केवळ त्यांच्या कार्यकर्त्यांपुरती मर्यादित नसून, संपूर्ण महाराष्ट्र आणि देशभरातील जनतेच्या भावनांचे प्रतिनिधित्व करणारी आहे.
महसूलमंत्री चंद्रशेखर बावनकुळे म्हणाले, “आम्ही केंद्र सरकारकडे या मागणीचा पाठपुरावा करणार आहोत. डॉ. पंजाबराव देशमुख यांना भारतरत्न मिळवून देण्यासाठी मी स्वतः प्रयत्नांची पराकाष्ठा करीन.” त्यांच्या या विधानाला उपस्थितांनी टाळ्यांच्या कडकडाटात पाठिंबा दर्शवला.
डॉ. पंजाबराव देशमुख यांच्या शेती, शिक्षण आणि सामाजिक सुधारणेसाठीच्या अतुलनीय योगदानाला आजच्या कार्यक्रमातून पुन्हा एकदा उजाळा मिळाला. त्यांच्या पुण्यतिथीनिमित्त त्यांना केवळ आदरांजलीच नव्हे, तर देशाच्या सर्वोच्च नागरी सन्मानाची मागणी जोर धरू लागली आहे. हा सन्मान त्यांच्या कार्याला मिळणारे न्यायाचे प्रतीक ठरेल, अशी भावना व्यक्त होत आहे.
