अमरावती : १९४४ साली मुंबईतील विक्टोरिया फोर्ट येथे एसएस फोर्ट स्टिकिन या ब्रिटीश मालवाहू जहाजावर १४०० टन स्फोटकांसह झालेल्या भीषण स्फोटात १३०० नागरिकांचा मृत्यू झाला, २७ जहाजे जळून खाक झाली आणि ६६ अग्निशमन जवानांना हौतात्म्य प्राप्त झाले. या हुतात्म्यांच्या स्मृतीप्रित्यर्थ दरवर्षी १४ ते २० एप्रिल दरम्यान भारतात राष्ट्रीय अग्निशमन सप्ताह साजरा केला जातो. या सप्ताहात अग्निशमन सेवेतील कर्मचाऱ्यांच्या शौर्य आणि बलिदानाचा गौरव केला जातो तसेच नागरिकांमध्ये अग्निप्रतिबंधक उपाययोजना आणि अग्निसुरक्षेबाबत जनजागृती केली जाते.
याच सप्ताहानिमित्त अमरावती जिल्हा सामान्य रुग्णालय आणि जिल्हा शल्य चिकित्सक कार्यालय परिसरात १८ एप्रिल २०२५ रोजी अग्निशमन विभागातर्फे जनजागृती कार्यक्रम आयोजित करण्यात आला. मुख्य अग्निशमन अधिकारी लक्ष्मण पावडे आणि अग्निशमन अधीक्षक संतोष केंद्रे यांच्या मार्गदर्शनाखाली फायरमन अमोल साळुंखे, योगेश ठाकरे, योगेश साबळे आणि वाहन चालक गौरव फुके यांनी प्रत्यक्षिकाद्वारे माहिती दिली.
या कार्यक्रमात आग म्हणजे काय, आगीचे प्रकार, आगीचे वर्गीकरण, आग विझवण्याच्या पद्धती, एलपीजी गॅस सिलेंडर हाताळण्याची काळजी आणि आगीच्या प्रसंगी स्वतःचा व इतरांचा बचाव कसा करावा याबाबत सविस्तर माहिती देण्यात आली. नर्सिंग महाविद्यालयातील प्रशिक्षणार्थींना अग्निप्रतिबंधक उपाययोजना आणि अग्निसुरक्षेचे महत्त्व समजावून सांगण्यात आले. प्रत्यक्षिकाद्वारे सादर केलेल्या प्रात्यक्षिकांनी उपस्थितांवर खोल प्रभाव पाडला.
या कार्यक्रमाने नागरिकांमध्ये अग्निसुरक्षेबाबत जागरूकता निर्माण करण्यास मदत झाली असून, अग्निशमन दलाच्या कार्याचे कौतुक करण्यात आले.
