बॅनरबाजीला चाप! विनापरवानगी बॅनरप्रकरणी पालकमंत्री बावनकुळे यांचा कार्यकर्त्यांना इशारा
अमरावती : गाडगे नगर, इर्विन चौक, जिल्हाधिकारी कार्यालय परिसरासह अमरावती शहरातील प्रमुख भागांमध्ये विविध पक्ष आणि संघटनांनी विनापरवानगी लावलेल्या बॅनरमुळे नागरिकांमध्ये नाराजी पसरली आहे. या बॅनरवर मनपाच्या परवानगीचा QR कोड नसल्याचं आढळलं. शुक्रवारी मनपा अतिक्रमण आणि परवाना विभागाने अनेक बॅनर जप्त केले असतानाही, शनिवारी पुन्हा नवीन बॅनर लावल्याचं दिसून आलं. रस्त्यांवर वाकलेल्या बॅनरमुळे अपघाताचा धोका वाढल्याने नागरिक संतप्त झाले आहेत.
पालकमंत्र्यांचा इशारा:
शनिवारी पंचवटी चौकातील शिक्षक मेळाव्यात मनपा आयुक्तांनी पालकमंत्री चंद्रशेखर बावनकुळे यांच्याकडे याबाबत तक्रार मांडली. बावनकुळे यांनी यावर थेट प्रतिक्रिया देत कार्यकर्त्यांना इशारा दिला. ते म्हणाले, “शहरात कोणत्याही राजकीय कार्यकर्त्यांनी विनापरवानगी बॅनर लावू नये. आता मनपा आयुक्त कोणाचे बॅनर काढतात, ते पाहू.” त्यांनी स्पष्ट केलं की, यापुढे अमरावतीत बॅनर आणि होल्डिंग केवळ परवानगीनेच लावले जाणार असून, मनपा प्रशासनाला कठोर कारवाईचे निर्देश देण्यात येणार आहेत.
नागरिकांनी विनापरवानगी बॅनर लावणाऱ्यांवर दंडात्मक कारवाई आणि नियमित तपासणीची मागणी केली आहे. “वाकलेले बॅनर अपघाताला निमंत्रण देतात. मनपाने यावर कायमस्वरूपी उपाय करावा,” अशी प्रतिक्रिया एका स्थानिकाने व्यक्त केली.
मनपाची कारवाई:
मनपा प्रशासनाने विनापरवानगी बॅनर हटवण्याची मोहीम तीव्र करण्याचं आश्वासन दिलं आहे. पालकमंत्र्यांच्या निर्देशानंतर येत्या काही दिवसांत कठोर कारवाई होण्याची शक्यता आहे. शहर स्वच्छ आणि सुरक्षित ठेवण्यासाठी प्रशासनाने नियमांचं काटेकोर पालन करण्याचं आवाहन केलं आहे.
