दर्यापूर : चंद्रपूर येथील नागरिकांनी स्थानिक मजीप्रा च्या कार्यालयाला ठोकले कुलूप

दर्यापूर : दर्यापूर तालुक्यातील चंद्रपूर गावात गेल्या काही दिवसांपासून सुरळीत पाणीपुरवठा होत नसल्याने संतप्त गावकरी आणि महिलांनी मंगळवारी (२२ एप्रिल) महाराष्ट्र जीवन प्राधिकरणाच्या पाण्याच्या टाकीवर धडक देत मुख्य गेटला कुलूप ठोकले. चंद्रपूर येथील पाण्याच्या टाकीतून तब्बल २५ गावांना पाणीपुरवठा केला जातो. मात्र, कर्मचाऱ्यांवरील गंभीर आरोप आणि पाण्याच्या गैरव्यवस्थापनामुळे गावकऱ्यांना पाणीटंचाईचा सामना करावा लागत आहे.

कर्मचाऱ्यांवर गंभीर आरोप
चंद्रपूर येथील पाणीपुरवठा टाकीवर तीन कर्मचाऱ्यांची नेमणूक आहे. गावकऱ्यांच्या आरोपानुसार, यापैकी एक कर्मचारी कर्तव्यावर असताना चंद्रपूर गावातील पाणीपुरवठ्याच्या वेळेत कपात करून आपल्या गावाला पाणी पुरवतो. याशिवाय, खल्लार स्टॉप येथील नळ कनेक्शन धारकांकडे व्हॉल्व्हचा पाना ठेवला जात असून, ते कनेक्शन धारक मनमर्जीने पाणी वापरतात. यामुळे मोठ्या प्रमाणात पाण्याचा अपव्यय होत असल्याचा ज्वलंत आरोप गावकऱ्यांनी केला आहे. परिणामी, मुख्य टाकीतील पाण्याची पातळी खालावते आणि चंद्रपूरसह इतर गावांना पाणीटंचाईला तोंड द्यावे लागते.

गावकऱ्यांचा आक्रोश आणि आंदोलन
संतप्त गावकऱ्यांनी आणि महिलांनी मंगळवारी सकाळी महाराष्ट्र जीवन प्राधिकरणाच्या टाकीच्या मुख्य गेटला कुलूप लावले. यावेळी गावचे सरपंच चंचल गजभिये, पोलीस पाटील महेंद्र मेश्राम, ग्रामपंचायत सदस्य विशाल घरडे यांच्यासह अनेक नागरिक आणि महिला उपस्थित होत्या. आंदोलनादरम्यान, चंद्रपूर येथून इतर गावांना पाणीपुरवठा करणाऱ्या व्हॉल्व्हचे पाने ग्रामपंचायतीकडे जमा करण्यात आले.

ग्रामपंचायतीची ठाम भूमिका
“जोपर्यंत संबंधित कर्मचाऱ्याची तात्काळ उचलबांगडी होत नाही आणि गावकऱ्यांना मुबलक पाणीपुरवठा मिळत नाही, तोपर्यंत कार्यालयाचे कुलूप उघडणार नाही आणि व्हॉल्व्हचे पाने परत देणार नाही,” अशी ठाम भूमिका सरपंच चंचल गजभिये आणि गावकऱ्यांनी घेतली आहे. गावकऱ्यांनी प्रशासनाला पाणीपुरवठा सुरळीत करण्यासाठी तात्काळ उपाययोजना करण्याची मागणी केली आहे.

प्रशासनाची भूमिका काय?
महाराष्ट्र जीवन प्राधिकरणाच्या अधिकाऱ्यांकडून याबाबत अद्याप कोणतीही अधिकृत प्रतिक्रिया मिळालेली नाही. गावकऱ्यांच्या आंदोलनामुळे परिसरात तणावाचे वातावरण आहे. पाणीटंचाईचा प्रश्न तातडीने सोडवला नाही तर आंदोलन तीव्र करण्याचा इशारा गावकऱ्यांनी दिला आहे.

पाणीटंचाईमुळे वाढत्या समस्या
चंद्रपूर आणि परिसरातील २५ गावांमधील नागरिकांना पाण्यासाठी वणवण भटकावे लागत आहे. विशेषतः उन्हाळ्याच्या काळात पाणीटंचाईने गंभीर स्वरूप धारण केले आहे. गावकऱ्यांचा आरोप आहे की, पाण्याचे योग्य नियोजन आणि वितरण न झाल्याने ही समस्या निर्माण झाली आहे.

या घटनेमुळे दर्यापूर तालुक्यातील पाणीपुरवठा व्यवस्थापनावर प्रश्नचिन्ह उपस्थित झाले आहे. प्रशासन याबाबत कोणती पावले उचलणार, याकडे सर्वांचे लक्ष लागले आहे.