परतवाडा येथील ४ खेळाडूंची ‘खेलो इंडिया वुमन लीग २०२५’साठी निवड
परतवाडा : परतवाडा येथील अमरावती जिल्हा पिंच्याक सिलॅट असोसिएशनच्या चार विद्यार्थिनींची केंद्र सरकारच्या ‘खेलो इंडिया वुमन लीग २०२५’ राष्ट्रीय स्पर्धेसाठी निवड झाली असून, त्या महाराष्ट्र राज्याचे प्रतिनिधित्व करणार आहेत.
ही स्पर्धा दिनांक १ ते ४ मे २०२५ दरम्यान नवी मुंबई येथे पार पडणार आहे. भारत सरकारच्या क्रीडा मंत्रालयाच्या वतीने या स्पर्धेचं आयोजन करण्यात आलं आहे.
महाराष्ट्र संघात परतवाड्याच्या ४ चमकदार खेळाडूंची निवड
या स्पर्धेसाठी निवड झालेल्या खेळाडूंमध्ये
- कु. आनंदी योगेश गायकवाड
- कु. आराध्या सागर महल्ले
- कु. आस्था रवी डाहे
- कु. त्रिशा अमोल काळबांडे
यांचा समावेश आहे. या सर्व खेळाडूंनी याआधी राज्यस्तरीय व जिल्हास्तरीय स्पर्धांमध्ये उल्लेखनीय कामगिरी करत आपली निवड पक्की केली आहे.
यशाचं श्रेय प्रशिक्षण व कुटुंबाला
या यशस्वी खेळाडूंनी आपलं यश मुख्य प्रशिक्षक मंगेश प्रभाकर गायकवाड यांचं मार्गदर्शन आणि आई-वडिलांच्या पाठिंब्याला दिलं आहे. सातत्यपूर्ण सराव, समर्पण आणि प्रशिक्षकांचे कुशल प्रशिक्षण हे त्यांच्या यशामागील खरे कारण आहे.
