परतवाडा : परतवाड्यातील प्रसिद्ध वाघामाता संस्थानच्या बागेत एका ५० वर्षीय इसमाने गळफास घेऊन आत्महत्या केल्याची धक्कादायक घटना आज सकाळी ११ वाजता उघडकीस आली. या घटनेमुळे परिसरात खळबळ उडाली आहे.
मृत व्यक्तीचे नाव उमेश बोर्डे असून तो पेशाने ड्रायव्हर होता. त्याने आत्महत्या केल्याची माहिती मिळताच नागरिकांनी तातडीने परतवाडा पोलिसांना कळवले. घटनेची माहिती मिळताच परतवाडा पोलिस ठाण्याचे ठाणेदार सुरेश मस्के तातडीने घटनास्थळी दाखल झाले.
घटनेच्या वेळी वाघामाता संस्थानचे अध्यक्ष अरुण दीक्षित हेही घटनास्थळी उपस्थित होते. त्यांनी पोलिस अधिकाऱ्यांना सूचना दिल्या की, मृतदेहाला कोणालाही स्पर्श करू देऊ नये.
पोलिसांनी घटनास्थळी पंचनामा करून मृतदेह उपजिल्हा रुग्णालयात पाठवला असून पुढील तपास सुरू आहे. मृत उमेश बोर्डे याच्या पश्चात पत्नी व एक मुलगा असा परिवार आहे.
आत्महत्येचे कारण अद्याप स्पष्ट झालेले नाही. पोलिस तपास सुरू असून, मृतकाच्या कुटुंबीयांची चौकशी करण्यात येत आहे.
