चिमुकल्यासह रस्त्यावर उतरली मुस्लिम महिला, अतिक्रमणाविरोधात आमरण उपोषण

अमरावती : सत्ता, प्रशासन आणि अन्यायाच्या संघर्षात एक आई आपल्या लेकरांसह न्यायासाठी रस्त्यावर उतरली आहे. अमरावती जिल्ह्यातील शिराळा गावातील नसरीन बानो या महिलेनं आपल्या दोन लहान मुलांसह जिल्हाधिकारी कार्यालयासमोर आमरण उपोषण सुरू केलंय. त्यांच्या हातात कुठलंही निवेदन नाही, पण आहे निर्धार… अन्यायाविरुद्ध लढण्याचा!

अतिक्रमणामुळे बंद झाला व्यवसाय, घरचा रस्ता झाला बंद
नसरीन बानो यांचा आरोप आहे की, गावातील एका प्रमुख राजकीय पक्षाच्या ग्रामपंचायत सदस्यानं आपल्या कुटुंबीयांसह जुन्या सार्वजनिक रस्त्यावर अतिक्रमण केलं आहे. यामुळे त्यांच्या घराचा मुख्य मार्ग पूर्णपणे बंद झाला असून, घरासमोर सुरू असलेला व्यवसायही ठप्प झाला आहे.

“मुलांना खायला घालायचं कसं? व्यवसाय बंद झाला. उत्पन्नाचं साधन नाही. प्रशासन केवळ पाहातंय, पण वाचवत नाही,” – नसरीन बानो यांचा आक्रोश

तक्रारी झाल्या पण कारवाई नाही
नसरीन बानो यांनी गेल्या अनेक महिन्यांपासून प्रशासनाकडे तक्रारी केल्या आहेत. मात्र, आजवर एकही ठोस कारवाई झाली नाही. यामुळे त्यांनी 20 मे पासून आमरण उपोषणाचा मार्ग स्वीकारला आहे. उपोषणाचा आज (21 मे) दुसरा दिवस आहे, पण प्रशासन अजूनही गप्प आहे.

स्थानीय सत्ताधाऱ्यांचं छुपं समर्थन?
नसरीन बानो यांचा आरोप आहे की, अतिक्रमण करणाऱ्यांना स्थानिक सत्ताधाऱ्यांचं समर्थन असल्यामुळे प्रशासन दुर्लक्ष करतंय. त्यामुळे न्याय मिळवण्यासाठीच रस्त्यावर उतरावं लागलं.

आईचा लढा, लेकरांसह उपोषण
सामान्य महिला नसरीन बानो यांनी दोन लहान मुलांसह उपोषण केल्याने हा लढा केवळ अतिक्रमणाविरोधात नाही, तर एका सामान्य नागरिकाच्या जगण्याच्या हक्कासाठीचा संघर्ष ठरत आहे. आईच्या डोळ्यातील अश्रू आणि लेकरांच्या भुकेने व्यवस्थेवर कठोर सवाल उपस्थित केलेत.