चिखलदऱ्यात भारताचा पहिला आणि आशियातील सर्वात लांब स्कायवॉक लवकरच होणार सुरु

चिखलदरा : देशातील पहिला आणि आशियातील सर्वात लांब स्कायवॉक लवकरच चिखलदऱ्यात पर्यटकांच्या स्वागतासाठी सज्ज होणार आहे. स्काय बॉक्स ट्रायल यशस्वीपणे सुरू झाली असून, जून 2025 मध्ये या प्रकल्पाचे उद्घाटन होण्याची शक्यता आहे.

गोरा घाट ते हरिकेन पॉइंट – 500 मीटर अद्भुत प्रवास
हा स्कायवॉक चिखलदऱ्यातील दोन प्रसिद्ध टेकड्यांमध्ये – गोरा घाट पॉइंट आणि हरिकेन पॉइंट – जोडला जात आहे. एकूण 500 मीटर लांबीचा हा स्कायवॉक आशिया खंडातील सर्वात लांब तर ठरणारच, पण त्यातल्या 100 मीटर लांबीचा भाग पूर्णतः काचेचा असून, पर्यटकांना आकाशातून चालण्याचा थरारक अनुभव देणार आहे.

एकाच केबलवर आधारित – जगातील पहिला स्कायवॉक
या स्कायवॉकचे वैशिष्ट्य म्हणजे तो एका केबलवर आधारित आहे, जे संपूर्ण जगात पहिल्यांदाच प्रत्यक्षात उतरवले जात आहे. त्यामुळे याचे आंतरराष्ट्रीय महत्त्व देखील वाढले आहे.

सुरक्षेचा उच्चतम दर्जा – IIT द्वारे वारा चाचणी पूर्ण
चिखलदरा ही 1188 मीटर उंचीवर वसलेली पर्यटनस्थळ आहे आणि येथे उच्च वारा प्रवाह असतो. त्यामुळे IIT तज्ज्ञांनी वारा अभिसरण (Wind Tunnel) चाचणी पूर्ण केली आहे, जेणेकरून स्कायवॉकचे बांधकाम अत्यंत सुरक्षित राहील.

प्रकल्पाचा खर्च – 34 कोटी रुपयांचा भक्कम निधी
या संपूर्ण प्रकल्पासाठी 34 कोटी रुपयांची गुंतवणूक करण्यात आली आहे. महाराष्ट्र पर्यटन विकास महामंडळ (MTDC) आणि खाजगी भागीदार यांच्यातील संयुक्त उपक्रमातून हा प्रकल्प साकारण्यात येत आहे.

चिखलदऱ्याच्या पर्यटनाला नवा चेहरा
हा स्कायवॉक केवळ महाराष्ट्रातील नव्हे तर देशभरातील पर्यटकांना आकर्षित करेल, असा विश्वास व्यक्त करण्यात येत आहे. जंगल सफारी, पाणथळ परिसर आणि थंड हवामान असलेल्या चिखलदऱ्यात हा स्कायवॉक एक विशेष आकर्षण ठरणार आहे

प्रतिनिधी – नितेश किल्लेदार