नागपुरात धडाकेबाज कारवाई: सीए रोडवर तरुणाकडून देशी पिस्तूल आणि जिवंत काडतुसे जप्त
नागपूर : तहसील पोलीस स्टेशनचे पोलीस हवालदार संजय शाही यांना मिळालेल्या खात्रीशीर गोपनीय माहितीच्या आधारे पोलिसांनी सीए रोडवरील मेयो हॉस्पिटलच्या सुरक्षा भिंतीजवळ सापळा रचून एक धक्कादायक कारवाई केली आहे. यामध्ये २४ वर्षीय तरुण शेख रेहान अब्दुल कादर याला देशी बनावटीचे पिस्तूल आणि जिवंत काडतुसेसह अटक करण्यात आली आहे.
५० हजारांचे देशी पिस्तूल आणि जिवंत काडतुसे जप्त
पोलिसांनी दिलेल्या माहितीनुसार, संशयिताच्या अंगझडतीदरम्यान त्याच्याकडे मॅगझीनसह एक जुने देशी बनावटीचे पिस्तूल (अंदाजे किंमत ₹५०,०००) आणि 7.65 KF प्रिंट असलेल्या दोन जिवंत काडतुशा (एकूण किंमत ₹२,०००) असा एकूण ₹५२,००० किमतीचा मुद्देमाल जप्त करण्यात आला.
हत्यार कायद्यानुसार गुन्हा दाखल
या कारवाईनंतर तहसील पोलीस स्टेशनमध्ये संबंधित तरुणाविरोधात भारतीय हत्यार कायद्यान्वये गुन्हा दाखल करण्यात आला आहे. पोलिसांकडून पुढील तपास सुरू असून आरोपीचे यापूर्वीचे गुन्हेगारी रेकॉर्ड तसेच पिस्तूल कुठून आणले, याचा तपास केला जात आहे.
पोलिसांची तत्परता; गुन्हेगारी कृत्यांवर आघात
तहसील पोलिसांच्या या तत्पर कारवाईमुळे नागपूर शहरात बेकायदेशीर शस्त्रास्त्र बाळगणाऱ्यांवर मोठा आघात झाला आहे. अशा कारवायांमुळे शहरातील गुन्हेगारी प्रवृत्तींना चाप बसण्यास मदत होईल, असा विश्वास नागरिकांनी व्यक्त केला आहे.
