वणी, यवतमाळ — वणी तालुक्यातील कायर गावाजवळील विदर्भ नदीच्या पूलावरून जाताना एक दुर्दैवी दुर्घटना घडली. पुराच्या पाण्याचा जोर एवढा होता की एक चारचाकी गाडी थेट नदीत कोसळली, या दुर्घटनेत एकाचा मृत्यू झाला असून दुसरा प्रवासी गंभीर जखमी झाला आहे.
मृत व्यक्तीचे नाव रामा कनाके असून, गंभीर जखमी व्यक्तीचे नाव भास्कर पुसाम आहे. हे दोघेही उमरी येथील रहिवासी असून डोंगरगावहून मंगळवारी रात्री परतत होते.
पुराच्या प्रवाहात गाडी वाहून गेली
दिवसभर संततधार पावसानंतर विदर्भ नदीला पूर आला होता. या पूरातूनच रामा कनाके यांनी गाडी पुढे काढण्याचा प्रयत्न केला. मात्र पाण्याचा प्रवाह अत्यंत जोरदार असल्याने गाडीवरील नियंत्रण सुटले आणि ती थेट नदीत कोसळून वाहून गेली.
दुर्घटनेत रामा कनाके यांचा मृत्यू झाला असून, भास्कर पुसाम यांना तातडीने कायरच्या ग्रामीण रुग्णालयात दाखल करण्यात आले आहे.
पोलीस व ग्रामस्थांचे तत्पर मदतकार्य
घटनेची माहिती मिळताच मुकुटबन पोलीस स्टेशनचे कर्मचारी घटनास्थळी दाखल झाले. स्थानिक ग्रामस्थांच्या मदतीने शोध व बचाव मोहीम राबवली गेली. काही वेळातच रामा कनाके यांचा मृतदेह सापडला.
प्रशासनाचे आवाहन – पुराच्या वेळी वाहतुकीपासून संयम राखा
प्रशासनाने नागरिकांना आवाहन केले आहे की, पुराच्या काळात वाहतुकीपासून दूर राहावे, नदी व नाल्यांच्या पातळीकडे दुर्लक्ष करू नये. अशा परिस्थितीत स्वतःचा व कुटुंबाचा जीव धोक्यात न घालता सुरक्षितता पाळावी.
प्रतिनिधी – दुर्गेश कान्हू
