अकोल्यात वंचित बहुजन आघाडीचं तीव्र आंदोलन! गोसेवा आयोगाच्या आदेशाविरोधात गुरांच्या बाजारासाठी लढा
अकोला : अकोल्यात आज वंचित बहुजन आघाडीकडून जोरदार आंदोलन करण्यात आलं. जिल्हाधिकारी कार्यालयासमोर हे आंदोलन होत असून महाराष्ट्र गोसेवा आयोगाने दिलेल्या आदेशांविरोधात वंचितने ठाम भूमिका घेतली आहे.
गुरांचा बाजार सुरू ठेवण्याची मागणी
वंचित बहुजन आघाडीच्या वतीने जिल्हाधिकाऱ्यांना निवेदन सादर करून महाराष्ट्र गोसेवा आयोगाने अधिकार नसताना दिलेला आदेश अमान्य करण्याची मागणी करण्यात आली.
गुरांचा बाजार बंद ठेवण्याचा आदेश वंचितने अन्यायकारक मानला असून
त्या आदेशाची अंमलबजावणी न करता गुरांचा बाजार पूर्ववत भरवण्यात यावा, अशी ठाम मागणी करण्यात आली आहे.
बियाण्याच्या कृत्रिम तुटवड्यावरही रोष
वंचित बहुजन आघाडीने आंदोलनाच्या माध्यमातून शेतकऱ्यांच्या समस्यांकडेही लक्ष वेधलं आहे.
अकोला जिल्ह्यात ‘अजित 105’ या बियाण्यासह इतर बियाण्यांचा कृत्रिम तुटवडा निर्माण करण्यात येत असल्याचा गंभीर आरोप करण्यात आला.
बियाण्याचे दर अनाठायी वाढवून व्यापारी शेतकऱ्यांची लूट करत असल्याची टीका यावेळी आंदोलकांनी केली.
वंचित बहुजन आघाडीची भूमिका
आंदोलनादरम्यान वंचित आघाडीच्या नेत्यांनी स्पष्ट केलं की,
शेतकऱ्यांचे हितसंबंध आणि त्यांच्या रोजगाराशी निगडित निर्णयांवर राजकीय किंवा प्रशासकीय अन्याय सहन केला जाणार नाही.
गुरांचा बाजार आणि बियाण्याच्या उपलब्धतेवर तातडीने निर्णय न झाल्यास आणखी तीव्र आंदोलन छेडण्याचा इशाराही त्यांनी दिला.
