अमरावतीत नवसारी बसस्टॉपजवळ तरुणाची मध्यरात्री हत्या; गाडगेनगर पोलिसांची धडक कारवाई,तिघे आरोपी अटकेत
अमरावती : शहरातील नवसारी बसस्टॉप परिसरात मध्यरात्री एका तरुणाची चाकूने भोसकून निर्घृण हत्या करण्यात आली. घटनेनंतर अवघ्या काही तासांत गाडगेनगर पोलीस ठाण्याच्या गुन्हे शोध (डीबी) पथकाने तिघा आरोपींना अटक करत कौतुकास्पद कामगिरी बजावली आहे.
हत्या झालेल्या तरुणाचे नाव निखिल सुभाष थोरात (वय २९) असून, तो आपल्या मित्रांसोबत बसस्टॉपजवळ उभा असताना वाद मिटवण्याच्या प्रयत्नात सामील झाला. मात्र, अचानक आरोपींनी त्याच्यावर धारदार शस्त्राने हल्ला केला. निखिलला गंभीर जखमी अवस्थेत तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला.
- अटक करण्यात आलेले आरोपी:
हेमाशु उर्फ ददू राजू छत्री (वय २२) - यश ओमप्रकाश कनोजे (वय २०)
- जयेश राजेंद्र गायकवाड (वय २०)
गुन्‍हा आणि तपासाची गती:
ही घटना मध्यरात्री १२.३० वाजताच्या सुमारास घडली. घटनेनंतर गाडगेनगर पोलिसांनी तातडीने तपास सुरू केला. सीसीटीव्ही फुटेज, तांत्रिक विश्लेषण आणि स्थानिक बातमीदारांच्या मदतीने आरोपींचा माग काढण्यात आला.
गुन्‍हा घडल्यानंतर काही तासांतच आरोपींना ताब्यात घेण्यात आले, ही पोलिसांच्या कार्यक्षमतेचे उदाहरण ठरते. सध्या आरोपींना अटक करून पुढील तपास सुरू आहे.
पोलीस अधिकाऱ्यांचे मत:
गाडगेनगर पोलिसांकडून मिळालेल्या माहितीनुसार, वाद विकोपाला गेल्याने ही हत्या झाली. पुढील तपासात वादाचे नेमके कारण, आरोपींचा गुन्हेगारी इतिहास आणि गुन्ह्यात वापरलेले शस्त्र यावर अधिक माहिती उघड होण्याची शक्यता आहे.
