बीडच्या खळेगावातील छत्रपती मल्टीस्टेट बँकेसमोर आत्महत्येने खळबळ, बँकांच्या विश्वासार्हतेवर प्रश्न

बीड : मुलीच्या लग्नासाठी ठेवी परत मिळाव्यात म्हणून सतत बँकेच्या चकरा मारणाऱ्या एका वडिलांनी अखेर टोकाचं पाऊल उचलत स्वतःचा अंत केला आहे. बीड जिल्ह्यातील गेवराई तालुक्यातील खळेगावात बुधवारी रात्री ही धक्कादायक घटना घडली. सुरेश आत्माराम जाधव (वय अंदाजे ५०) यांनी छत्रपती मल्टीस्टेट बँकेच्या गेटला गळफास घेऊन आत्महत्या केली.

16 लाख रुपये अडकले, मदतीऐवजी मौन
मिळालेल्या माहितीनुसार, जाधव यांचे छत्रपती मल्टीस्टेट बँकेत 11 लाख रुपये तर ज्ञानराधा मल्टीस्टेट बँकेत 5 लाख रुपये ठेवीच्या स्वरूपात होते. मुलीच्या विवाहासाठी त्यांना तातडीने पैशांची गरज होती. मात्र अनेक वेळा बँकेच्या कार्यालयात जाऊनही त्यांना पैसे मिळाले नाहीत. बँक प्रशासनाकडून सतत टाळाटाळ करण्यात येत होती. या सततच्या मानसिक त्रासाला कंटाळून त्यांनी आत्महत्येचा निर्णय घेतला.

कुटुंबासह बँकेत गेले, थोड्याच वेळात मृत अवस्थेत आढळले
बुधवारी रात्री उशिरा सुरेश जाधव आपल्या कुटुंबासह छत्रपती मल्टीस्टेट बँकेजवळ गेले होते. काही वेळातच ते बँकेच्या मुख्य गेटला गळफास घेतलेल्या अवस्थेत आढळले. या घटनेमुळे खळेगाव परिसरात हळहळ व्यक्त केली जात आहे. स्थानिक पोलिसांनी घटनास्थळी धाव घेऊन पंचनामा केला असून पुढील तपास सुरू आहे.

मल्टीस्टेट बँकांवरील विश्वासाला धक्का
या घटनेनंतर पुन्हा एकदा मल्टीस्टेट बँकांच्या विश्वासार्हतेवर प्रश्नचिन्ह निर्माण झाले आहे. ठेवीदारांची फसवणूक, ठेवी परत न देणे, वारंवार विनवण्या करूनही उत्तर न देणे असे प्रकार अनेक ठिकाणी समोर येत आहेत. या पार्श्वभूमीवर सरकारने आणि संबंधित आर्थिक नियंत्रण संस्थांनी तत्काळ लक्ष देण्याची गरज निर्माण झाली आहे.

• महत्त्वाचे मुद्दे:
  पीडिताचं नाव: सुरेश आत्माराम जाधव, वय ५० (रा. खळेगाव)
• बँका: छत्रपती मल्टीस्टेट बँक (₹11 लाख), ज्ञानराधा मल्टीस्टेट (₹5 लाख)
• घटना स्थळ: छत्रपती मल्टीस्टेट बँक गेट, खळेगाव, बीड
• घटना वेळ: बुधवार, रात्री उशिरा
• कारण: मुलीच्या लग्नासाठी पैसे न मिळाल्याने मानसिक तणाव