तरुणीवर पेट्रोल टाकत जीवंत जाळलं, रात्रीच्या वेळी घडली भयंकर घटना
मुंबई :- मुंबईतील अंधेरी भागात भयंकर घटना समोर आली आहे. एका १७ वर्षीय मुलीला जिवंत जाळण्याचा प्रयत्न झाल्याचा भीषण प्रकार घडला आहे. मुलगी यात मोठ्या प्रमाणात जळाली असून तिची मृत्यूशी संघर्ष करत आहे. या घटनेने परिसरात एकच खळबळ उडाली असून भर मुंबईत मुलीवर झालेल्या या जाळण्याच्या प्रयत्नाने नागरिकांमधून संताप व्यक्त होत आहे.
नेमकं काय घडलं?
रविवारी रात्री जवळपास साडे अकराच्या सुमारास मुलीवर आरोपीने पेट्रोल टाकून तिला जाळण्याचा प्रयत्न केला. या हल्ल्यात मुलगी जवळपास ६० टक्के भाजली आहे. अंधेरीतील मरोळ येथील १७ वर्षीय मुलगी आणि ३० वर्षीय तरुणाची मागील काही महिन्यांपासून मैत्री होती. पण मुलीच्या आईने आरोपीला तंबी देत आपल्या मुलीला न भेटण्याचं सांगितलं होतं. त्याच रागातून मुलीला जीवंत जाळण्याचा प्रयत्न झाल्याचा प्राथमिक अंदाज व्यक्त केला जात आहे.
पोलिसांनी दिलेल्या माहितीनुसार, मुलगी रात्री जेऊन झाल्यानंतर आपल्या मैत्रिणींसोबत चाळीत बसली होती. त्याचवेळी आरोपी जितेंद्र तांबे तिथे आला. त्याने काहीही कळायच्या आत मुलीवर पेट्रोल टाकलं आणि आग लावली. या प्रकारात आरोपी जितेंद्रही जखमी झाला. तरुणी या हल्ल्यात ६० टक्के जळाली असून पोट, हात, गुप्तांग, पाय, चेहरा, मानेवर गंभीर जखमा झाल्या आहेत. तरुणीला काहीही बोलता येत नसून तिची प्रकृती गंभीर आहे. तरुणीवर कूपर रुग्णालयात उपचार सुरू आहेत. या हल्ल्यात आरोपीदेखील काही प्रमाणात जळाला असून त्याच्यावरही उपचार सुरू आहेत.
याप्रकरणी एफआयआर दाखल करण्यात आली आहे. यात दिलेल्या माहितीनुसार, मुलीने तिच्या आईला सांगितलं, की माझी काहीही चूक नाही, जितूने माझ्यावर पेट्रोल टाकलं आणि मला आग लावली. पोलिसांनी मुलीच्या आईने केलेल्या तक्रारीचा हवाला देत सांगितलं, की मुलगी आणि आरोपी एकमेकांना ओळखत होते. दोघं मागील काही महिन्यांपासून सतत भेटत होते.
मुलीच्या आईने दिलेल्या तक्रारीनुसार, आईने मुलीला ती कोणासोबत रिलेशनशिपमध्ये आहे का याबाबत विचारणा केली होती. मात्र मुलीने यावर नकार दिला होता. त्यानंतर मुलीच्या आईने आरोपीची भेट घेत त्याला आपल्या मुलीशी न भेटण्याचा इशारा दिला होता. आईने दिलेल्या तक्रारीवरुन आरोपीविरोधात भारतीय न्याय संहितेच्या तरतुदीनुसार ॲसिड इत्यादीचा वापर करून गंभीर दुखापत केल्याचा गुन्हा नोंदवण्यात आला असून याप्रकरणी पुढील तपास सुरू आहे.
