अंदाज चुकला अन् घात झाला; पाच जीवलग मित्रांचा तलावात बुडून मृत्यू, चंद्रपूरवर शोककळा
धुळवडीनंतर तलावात पोहण्यासाठी गेलेल्या पाच मित्रांचा खोल पाण्यात बुडाल्याने मृत्यू झाल्याची दुर्दैवी घटना चंद्रपूर जिल्ह्यातील नागभीड येथील घोडाझरी तलावात घडली आहे.
चंद्रपूर: धुळवडीनंतर तलावात पोहण्यासाठी गेलेल्या पाच मित्रांचा खोल पाण्यात बुडाल्याने मृत्यू झाल्याची दुर्दैवी घटना चंद्रपूर जिल्ह्यातील नागभीड येथील घोडाझरी तलावात घडली आहे. जनक गावंडे, यश गावंडे, अनिकेत गावंडे, तेजस गावंडे, तेजस ठाकरे अशी मृतांची नावे आहेत. मृत्यू पावलेले पाच मित्र चिमूर तालुक्यातील साठगाव-कोलारी येथील आहेत. घटनेची माहिती मिळताच पोलीस घटनास्थळी पोहोचले. या दुःखद घटनेने जिल्ह्यावर शोककळा पसरली आहे.
जिल्ह्यातील प्रसिद्ध घोडाझरी तलावात पोहण्याचा आनंद घेण्यासाठी चिमूर तालुक्यात येणाऱ्या साठगाव-कोलारी गावातील पाच तरुण आज दुपारच्या सुमारास आले होते. जनक गावंडे, यश गावंडे, अनिकेत गावंडे, तेजस गावंडे, तेजस ठाकरे या पाच जीवलग मित्रांनी पोहण्यासाठी तलावात उडी घेतली. पाण्याचा अंदाज न आल्याने पाच मित्र बुडाले. मृतांपैकी यश, जनक हे सख्खे भाऊ आहेत. तर अनिकेत आणि तेजस हे चुलत भाऊ आहेत. तरुण मुलांच्या अकाली निधनानं कुटुंबियांना मोठा धक्का बसला आहे.
घोडझरी तलावात पोहोण्यासाठी गेलेल्यांमध्ये आर्यन इंगोले या तरुणाचाही समावेश होता. तो बुडालेल्या तरुणांच्या सोबतीला होता. या दुदैवी घटनेत आर्यनने कसेबसे स्वतःला वाचवले. त्याने डोळ्यादेखत पाच मित्रांना बुडताना पाहिले. या घटनेने तो पुरता हादरला. त्याने स्वतःला कसेबसे सावरले आणि पोलिसांना घटनेची माहिती दिली.
घटनेची माहिती पोलीस विभागाला देण्यात आली. पोलिसांनी घटनास्थळ गाठून बुडालेल्या पाच तरुणांचा शोध सुरु केला. स्थानिक मच्छिमारांची मदत पोलीस विभागाने घेतली. पाचही तरुणांचे मृतदेह हाती लागले आहेत. जिल्हात शांततेत आणि उत्साहात होळीचा सण संपन्न झाला. पण या आनंदावर आता विरजण पडले आहे.
