वायगाव : भातकुली तालुक्यातील वायगाव येथे हनुमान जयंतीनिमित्त हनुमान मंदिर देवस्थानच्या वतीने भक्तिमय वातावरणात उत्सव साजरा करण्यात आला. गावाच्या मुख्य चौकातून काढण्यात आलेल्या भव्य शोभायात्रेने संपूर्ण वायगाव नगरी भक्तिरसात न्हाली.
शोभायात्रेत भजन-कीर्तन, टाळ-मृदंग आणि “जय श्रीराम, जय हनुमान”च्या जयघोषांनी वातावरण दुमदुमले. सुसज्ज रथ, वेशभूषा केलेले बाल हनुमान आणि पारंपरिक वाद्यांच्या गजराने मिरवणुकीला विशेष रंग चढला. गावातील महिला, युवा मंडळ, लहान मुले तसेच वृद्ध अशा सर्वांनी उत्साहाने सहभाग नोंदवला.
कार्यक्रमानंतर आयोजित महाप्रसादाचा शेकडो भाविकांनी लाभ घेतला. शिस्तबद्ध आणि भक्तिमय वातावरणात पार पडलेल्या या उत्सवासाठी स्थानिक देवस्थान समिती आणि ग्रामस्थांचे मोलाचे योगदान लाभले. गावकऱ्यांनी एकत्र येऊन हनुमान जयंतीचा हा सोहळा अविस्मरणीय बनवला.
