नवव्या महिन्यात नवऱ्याचं दुसऱ्या महिलेशी अफेअरचा संशय प्रश्न विचारुन भंडावून सोडलं संतापलेल्या नवऱ्याने पोटातील चिमुकल्या जीवासोबत तिलाही संपवलं

विशाखापट्टणम : आंध्र प्रदेशात एक मन सुन्न करणारी घटना समोर आली आहे. प्रेमविवाह झालेलं जोडपं काहीच दिवसांमध्ये आई-बाबा होणार होते. मात्र, दोघांमध्ये वाद झाला आणि सर्व आंनद मातीमोल झाला. दोघांनी प्रेमविवाह केला होता. लग्नानंतर काही महिन्यांतच दोघांमध्ये वाद सुरू झाले. एके दिवशी, वाद झाला आणि त्याने गर्भवती पत्नीचा गळा दाबून खून केला. घटनेनंतर, त्याने पत्नीचा नैसर्गिक मृत्यू असल्याचे सिद्ध करण्यासाठी बनाव रचला, परंतु तिच्या कुटुंबाने तक्रार केल्यानंतर सर्व सत्य समोर आले. विशाखापट्टणमच्या पालेम पोलिसांनी आरोपी पतीला अटक केली आहे.

पोलिसांनी दिलेल्या माहितीनुसार, महिलेचे नाव अनुषा आहे. ती 27 वर्षांची होती आणि अनकापल्ले जिल्ह्यातील अडुरोड येथील होती. आरोपी पतीचे नाव ज्ञानेश्वर आहे. 28 वर्षीय ज्ञानेश्वर हा विझागच्या दुव्वाडा भागात राहतो. ज्ञानेश्वर आणि अनुषाचे लग्न अडीच वर्षांपूर्वी 10 डिसेंबर 2022 रोजी झाले. हे लग्न ज्ञानेश्वरच्या पालकांच्या इच्छेविरुद्ध झाले होते. ज्ञानेश्वर विशाखापट्टणममधील हिंदुस्तान स्काउट्स अँड गाईड्स ऑर्गनायझेशनमध्ये काम करतात. लग्नानंतर, दोघेही प्रथम अरिलोवा आणि नंतर पेंडुर्थी येथे गेले. यानंतर हे जोडपे मधुरावाडा येथे स्थलांतरित झाले होते.

अनुषाच्या कुटुंबीयांनी केला हा आरोप

अनुषाच्या कुटुंबाचा आरोप आहे की, ज्ञानेश्वरने तिला याआधीही सोडण्याचा प्रयत्न केला होता. अनुषा गर्भवती राहिल्यानंतर, ज्ञानेश्वर तिला फसवत होता. अनुषाची डिलिव्हरीची तारीख जवळ आली होती. सोमवारी त्यांना एका खाजगी रुग्णालयात दाखल करण्यात येणार होते.सोमवारी सकाळी अचानक ज्ञानेश्वरने अनुषाच्या नातेवाईकांना आणि मित्रांना फोन केला. त्याने सांगितले की, अनुषा बेशुद्ध पडली आहे. तिला ताबडतोब अरिलोवा येथील रुग्णालयात नेण्यात आले, तिथे डॉक्टरांनी तिला मृत घोषित केले.

आरोपी पतीने आपला गुन्हा केला कबूल

अनुषाच्या पालकांना ज्ञानेश्वरवरती संशय आला. त्याने पोलिसात तक्रार दाखल केली. चौकशीदरम्यान, ज्ञानेश्वरने आपला गुन्हा कबूल केला. त्याने सांगितले की, त्याने अनुषाशी झालेल्या वादानंतर तिचा गळा दाबून तिचा खून केला. त्याने सांगितले की, अनुषाला ज्ञानेश्वरचे दुसऱ्या कोणाशी तरी प्रेमसंबंध असल्याचा संशय होता. ती त्याला यावरून त्रास देत होती. पोलिसांनी ज्ञानेश्वरविरुद्ध खुनाचा गुन्हा दाखल केला आहे. पोलीस या प्रकरणाची सखोल चौकशी करत आहेत.ते हत्येमागील खरे कारण शोधण्याचा प्रयत्न करत आहेत. या घटनेवर विजागमधील अनेक महिला संघटना आणि अनुषाच्या कुटुंबाने ज्ञानेश्वरला कठोर शिक्षा देण्याची मागणी केली आहे.

मित्रांना आजारपणाबद्दल सांगितले

वृत्तानुसार, भांडणादरम्यान, ज्ञानेश्वरने अनुषाचा गळा दाबून खून केला, तिची काही आठवड्यात प्रसूती होणार होती. पत्नीची हत्या केल्यानंतर, स्केप्समधील सागर नगर व्ह्यूपॉईंटजवळ फास्ट-फूड स्टॉल चालवणाऱ्या ज्ञानेश्वरने त्याच्या मित्रांना सांगितले की अनुषा आजारी आहे. तिच्या प्रकृतीबद्दल ऐकून नातेवाईक आणि मित्रांनी त्याला रुग्णालयात नेले, जिथे डॉक्टरांनी तिला मृत घोषित केले. ज्ञानेश्वरने पीएम पालम पोलिसांसमोर आपला गुन्हा कबूल केला, त्यानंतर त्याला ताब्यात घेण्यात आले.