तिवसा : तिवसा शहरातील सार्शी मार्गालगत असलेल्या कचरा डेपोला आज दुपारी भीषण आग लागल्याने परिसरात एकच खळबळ उडाली. ही आग इतकी तीव्र होती की अंदाजे ४०० टन कचरा काही वेळातच जळून खाक झाला. ही घटना दुपारी १ वाजता घडली.
अग्निशमन दलांचा शर्थीचा संघर्ष
तिवसा नगरपंचायतीच्या अग्निशमन दलाने आग विझवण्यासाठी तात्काळ प्रयत्न सुरू केले, मात्र आगीने रौद्ररूप धारण केल्यामुळे धामणगाव रेल्वे, मोर्शी आणि आष्टी येथूनही अग्निशमन गाड्या पाचारण करण्यात आल्या. या चारही गाड्यांनी सलग ३ तास प्रयत्न करून अखेर आग नियंत्रणात आणली.
धुराने व्यापला संपूर्ण परिसर
या आगीतून घनकचऱ्याचा मोठा ढिग जळल्यामुळे घन धूर आकाशात पसरला होता. परिसरात धोक्याची परिस्थिती निर्माण झाली होती. मात्र वेळीच हस्तक्षेप केल्यामुळे कोणतीही जीवितहानी झाली नाही, ही दिलासा देणारी बाब ठरली.
नगरपंचायतीची तारांबळ, कर्मचारी सतर्क
घटनेनंतर नगरपंचायतीचे अधिकारी व कर्मचारी घटनास्थळी सतत उपस्थित राहिले. त्यांनी मदतकार्यात सक्रिय सहभाग घेत आग आटोक्यात आणण्यासाठी अथक प्रयत्न केले.
आगीचे कारण अद्याप अस्पष्ट, चौकशी सुरू
या भीषण आगीचे नेमके कारण अद्याप स्पष्ट झालेले नाही. मात्र, प्राथमिक चौकशी सुरू करण्यात आली आहे. घनकचऱ्याच्या साठ्यामुळे आगीचे प्रमाण वाढल्याचा अंदाज व्यक्त करण्यात येत आहे.
