आपत्ती व्यवस्थापन कार्यशाळेचा समारोपविभागातील अधिकारी, कर्मचाऱ्यांना दिली माहिती
अमरावती : आगामी मान्सून आणि उन्हाळ्यात निर्माण होणाऱ्या नैसर्गिक आपत्तींचा प्रभावी सामना करण्याच्या दृष्टीने आज अमरावतीत एक दिवसीय आपत्ती व्यवस्थापन आणि हवामान बदल कार्यशाळा उत्साहात पार पडली. ही कार्यशाळा आपत्ती व्यवस्थापन व मदत कक्ष आणि भारतीय हवामान खाते यांच्या संयुक्त विद्यमाने आयोजित करण्यात आली होती.
या कार्यशाळेत विभागीय अधिकारी, शासकीय कर्मचारी, स्वयंसेवी संस्था आणि नागरिक यांनी सक्रिय सहभाग नोंदवला. आगामी कालावधीत येणाऱ्या उष्णतेच्या लाटा, पूर, वीज कोसळणे, गारपीट आणि भूकंप यासारख्या आपत्तींसंदर्भात सविस्तर मार्गदर्शन करण्यात आले.
प्रमुख मुद्दे व मार्गदर्शन:
हवामान खात्याच्या आधुनिक तंत्रज्ञानाचा वापर करून मिळणाऱ्या अचूक अंदाजाचे महत्त्व स्पष्ट करण्यात आले.
दामिनी ॲप, पब्लिक ऑब्झर्वेशन ॲप आणि ‘हर हर मौसम, हर घर मौसम’ मोहिमेची माहिती देत नागरिकांनी वेळोवेळी मिळणाऱ्या अलर्ट्सकडे लक्ष देण्याचे आवाहन करण्यात आले.
आपत्कालीन परिस्थितीत प्रथमोपचार, सुरक्षिततेची उपाययोजना आणि खबरदारी यावर तज्ज्ञांनी मार्गदर्शन केले.
जिल्हाधिकारी सौरभ कटियार यांनी सांगितले की, “आपत्ती ही कधीही येऊ शकते. त्यामुळे प्रत्येक यंत्रणा आणि नागरिकांनी सज्ज असणे आवश्यक आहे. कार्यशाळेतील मार्गदर्शन आपत्कालीन परिस्थितीत अमूल्य ठरेल.”
जिल्हा आपत्ती व्यवस्थापन अधिकारी सुरेंद्र रामेकर यावेळी उपस्थित होते.
