अमरावती : नागपूरपासून पंढरपूरपर्यंत दरवर्षी निघणाऱ्या पायदळ पालखी वारीने यंदा आपले ७५वे वर्ष म्हणजेच “अमृतमहोत्सवी वर्ष” गाठले आहे. या ऐतिहासिक पायी वारीने रविवारी (२६ मे) अमरावती शहरात उत्साहात प्रवेश केला, आणि या सोहळ्याचे दृश्य आमच्या सिटी न्यूज प्रतिनिधीने आपल्या कॅमेऱ्यात कैद केले.
थकवा नव्हे, उत्साहच उत्साह!
कोंढाळी येथून सुरू झालेली ही पवित्र पालखी वारी वृद्ध, महिला, बालगोपाल, आणि कुटुंबांसह हजारो भाविकांनी भगव्या ध्वजासह सुरुवात केली. वयोवृद्ध महिलांच्या डोक्यावर तुळस, तर हातात भगव्या पताका घेऊन भाविकांनी भक्तिगीतांच्या निनादात मार्गक्रमण सुरू ठेवले.
७५ वर्षांची परंपरा – भक्ती आणि सेवा यांची गाथा
ही पालखी वारी सात दशके अविरत चालत असून, यंदाचे अमृतमहोत्सवी वर्ष म्हणून अधिकच भव्य स्वरूपात साजरे करण्यात येत आहे. वारीत सहभागी झालेले भाविक “ज्ञानोबा माऊली तुकाराम”, “पंढरपूर वासियांची जय जयकार” अशा गजरात पुढे सरकत होते.
कुटुंबासह सहभागी भाविक
वारीत लहान बालकांपासून ते वयोवृद्धांपर्यंत सर्वच वयोगटातील भाविक सहभागी झाले होते. एकत्र कुटुंबातील प्रेम, श्रद्धा आणि भक्ती यांचे अनोखे दर्शन वारीत दिसून आले. काही वृद्ध भाविकांनी २०-२५ वर्षांपासून सलग वारीत सहभाग घेतल्याची माहिती दिली.
