उषाताई मातृदीपक योजने”चा जीवनदायी स्पर्श: नवजात बालकाला मोफत उपचारांनी नवे जीवन

अमरावती : अमरावती जिल्ह्यातील डॉ. राजेंद्र गोडे वैद्यकीय महाविद्यालय व रुग्णालयाने “उषाताई मातृदीपक योजना”अंतर्गत एक नवजात बाळाला जीवघेण्या आजारातून वाचवून नवा श्वास दिला आहे. कमी दिवसांचे व कमी वजनाचे हे बाळ क्लेबसिएला न्यूमोनिया या गंभीर जंतू संसर्गाने त्रस्त होते. अत्याधुनिक नवजात शिशु विभागात तब्बल २५ दिवस मोफत उपचार करून बाळाला सुखरूप डिस्चार्ज देण्यात आला.

उषाताई मातृदीपक योजना म्हणजे काय?
इंदिरा बहुउद्देशीय संस्थेच्या श्रीमती उषाताई राजेंद्र गोडे यांच्या नावाने सुरु करण्यात आलेल्या या योजनेतून नवजात बाळांच्या जीवनासाठी आवश्यक महागड्या औषधोपचारांची मोफत सुविधा पुरवली जाते. मातृत्व आणि बालसंगोपनाचा आदर्श ठरावी, अशी ही योजना आता गरजू मातांसाठी एक आश्वासक दीप बनली आहे.

जीवघेण्या संसर्गावर २५ दिवस संघर्ष
रुग्णालयात दाखल झालेले हे बाळ दूध पचवू शकत नव्हते. तपासणीअंती जीवघेण्या क्लेबसिएला न्यूमोनिया जंतूसंसर्गाचे निदान झाले. डॉक्टरांनी तातडीने PICC लाइनद्वारे औषधोपचार सुरू केले. महागडी औषधे, सतत सलाईन आणि बाळावर लक्ष ठेवणे या सर्व उपचारांची पूर्तता “उषाताई मातृदीपक योजना” अंतर्गत पूर्णपणे मोफत करण्यात आली.

संघर्ष आणि समर्पणाचे प्रतीक ठरले आरोग्यसेवक
बालरोग विभागातील तज्ज्ञ डॉक्टर — डॉ. सचिन दमके, डॉ. संदीप दानखडे, डॉ. स्नेहल भुतडा, डॉ. दिव्यांनी ढोले, डॉ. आदर्श गंधे आणि डॉ. विजयसिंह राजपूत तसेच परिचारिका मनीषा चावरे, प्रजनवी कांबळे, स्वप्ना देशमुख, मोनिका वानखडे, निकिता वाघमारे, नम्रता मनोहरे यांच्या अथक प्रयत्नांमुळे हे उपचार यशस्वी झाले.

या कठीण काळात रात्रंदिवस आणि सुट्यांचाही विचार न करता दिलेले योगदान कौतुकास्पद ठरले.

कुटुंबीयांची भावना आणि प्रशासनाचा गौरव
बाळाच्या सुटीच्या वेळी नातेवाईकांनी अश्रुपूर्ण डोळ्यांनी आभार मानले आणि सांगितले, “लाखो रुपयांच्या उपचारांचा खर्च उषाताई योजनेमुळे वाचला. ही योजना गरिबांसाठी एक वरदान आहे.”

संस्थेचे नेतृत्व आणि सामाजिक बांधिलकी
उपक्रमाचे नेतृत्व करीत असलेल्या संस्थेचे अध्यक्ष श्री योगेंद्रजी गोडे, सचिव मिस तन्वी गोडे, सीईओ डॉ. योगेश गोडे, अधिष्ठाता डॉ. सौ. सुधा जैन, प्रधान संचालक डॉ. दिलीप गोडे, वैद्यकीय अधीक्षक डॉ. नीरज मुरके, व संचालक डॉ. सुनील हातखर यांचे योजनेला सातत्याने मार्गदर्शन लाभले.

डॉ. संदीप दानखडे यांनी सर्व वरिष्ठांचे मनःपूर्वक आभार मानले. डॉ. मुरके यांनीही रुग्ण हितासाठी सुरू असलेल्या या योजनेचा जास्तीत जास्त गरजू रुग्णांनी लाभ घ्यावा, असे आवाहन केले.

सुरक्षित माता, सुरक्षित मूल – हेच ध्येय
“उषाताई मातृदीपक योजना ही गरोदर महिलांचे आणि नवजात बालकांचे आरोग्य सुरक्षित ठेवण्यासाठी एक क्रांतिकारी पाऊल आहे. आधुनिक आरोग्य सुविधांची मोफत उपलब्धता हेच या योजनेचे वैशिष्ट्य आहे,” असे संचालक मंडळाने स्पष्ट केले.