अमरावतीच्या आमदार सौ.सुलभाताई खोडके यांनी घेतली महाराष्ट्र विधानसभा सदस्यत्वाची शपथ

“मी सौ.सुलभा संजय खोडके”….आमदार म्हणून नव्या कार्यभाराला सुरुवात

अमरावती ०७ डिसेंबर :- राज्यात शिंदे-फडणवीस-अजित पवार यांच्या नेतृत्वातील महायुतीचे सरकार स्थापन होताच आता वर्ष २०२४ -२०२९ पर्यंतच्या पंधराव्या महाराष्ट्र विधानसभेवर निवडून आलेल्या नवनिर्वाचित आमदारांना पद व गोपनीयतेची शपथ देण्याला घेऊन महाराष्ट्र विधानसभा-डिसेंबर २०२४ चे तीन दिवसीय विशेष अधिवेशन आजपासून बोलाविण्यात आले आहे. विधानसभेचे हंगामी अध्यक्ष कालिदास कोळंबकर यांनी महाराष्ट्र विधानसभेच्या २८८ जागांवर निवडून आलेल्या आमदारांना विधानसभा सदस्यत्वाची शपथ दिली. ज्यामध्ये ३८, अमरावती विधानसभा मतदार संघातून दुसऱ्यांदा निवडून आलेल्या महायुती-राष्ट्रवादी काँग्रेस पार्टीच्या नवनिर्वाचित आमदार सौ. सुलभाताई संजय खोडके यांनी आपल्या महाराष्ट्र विधानसभा सदस्यत्वाची शपथ घेऊन कार्यभाराला सुरुवात केली आहे. यावेळी सभागृहातील उपस्थित सर्व आमदारांनी त्यांचे स्वागत व अभिनंदन केले. याप्रसंगी सभागृहात राज्याचे मुख्यमंत्री देवेन्द्रजी फडणवीस,उपमुख्यमंत्री एकनाथजी शिंदे,उपमुख्यमंत्री ना.अजितदादा पवार आदींसह महाराष्ट्र विधानसभेचे नवनिर्वाचित सदस्य उपस्थित होते.

सांगण्यात येते की, अमरावती जिल्ह्याचा समाजकारण,राजकारण ,सहकार व महिला चळवळीत अग्रणी असलेल्या आमदार सौ. सुलभाताई खोडके या तिसऱ्यांदा महाराष्ट्र विधानसभेवर पोहोचल्या आहे. मागील वर्ष २०१९ ते २०२४ च्या विधानसभेच्या पंचवार्षिक काळामध्ये आमदार सौ. सुलभाताई खोडके यांनी सर्वाधिक ३४१ प्रश्न उपस्थित करून विदर्भातील सर्वाधिक प्रश्न उपस्थित करणाऱ्या आमदार म्हणून लौकिक मिळविला आहे. आता महायुती सरकारच्या काळात राष्ट्रवादी कॉंग्रेस पार्टीच्या आमदार म्हणून त्यांनी नव्या कार्यकाळाला सुरुवात केली असल्याने अमरावती विधानसभा मतदार संघामध्ये उत्साह व आनंद व्यक्त होत आहे.