विधानसभेच्या अध्यक्षपदी पुन्हा एकदा राहुल नार्वेकर यांची निवड झाली आहे. महाविकास आघाडीकडून एकाही उमेदवाराने अर्ज दाखल केला नाही. त्यामुळे राहुल नार्वेकर यांची आज एकमताने विधानसभेच्या अध्यक्षपदी निवड झाली आहे. मुख्यमंत्री देवेंद्र फडणवीस यांनी विधानसभा अध्यक्ष म्हणुन राहूल नार्वेकर यांची निवड करावी, यासाठी प्रस्ताव मांडला. यानंतर अनिल पाटील यांनी अनुमोदन दिलं. राहुल नार्वेकर यांची आवाजी मतदानाने एकमताने विधानसभा अध्यक्षपदी निवड झाली. राहुल नार्वेकर यांची निवड झाल्यानंतर परंपरेनूसार राहुल नार्वेकर यांना मुख्यमंत्री, उपमुख्यमंत्री विधानसभा अध्यक्षांच्या दालनात घेऊन गेले. मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, शरद पवार गटाचे नेते जयंत पाटील, काँग्रेसचे नेते नाना पटोले हे राहुल नार्वेकरांना अध्यक्षपदाच्या दालनापर्यंत घेऊन गेले.
यानंतर हात मिळवणी करत राहुल नार्वेकरांचे अभिनंदन देखील केले. राहुल नार्वेकर हे कुलाबा विधानसभा मतदारसंघातून भाजपकडून सलग दुसऱ्यांदा निवडून आले आहेत. राहुल नार्वेकर यांची आवाजी मतदानाने एकमताने निवड झाली. विधानसभेच्या अध्यक्षपदी सलग दुसऱ्यांदा निवडून येणारे अॅड. राहुल नार्वेकर हे संयुक्त महाराष्ट्राचे दुसरे अध्यक्ष ठरले आहे.
राहुल नार्वेकर यांच्या बिनविरोध निवडीनंतर मुख्यमंत्री देवेंद्र फडणवीस यांनी अभिनंदन प्रस्तावावेळी नार्वेकरांची चौफेर तारीफ केली. मी पुन्हा येईन, असं तुम्ही म्हणाला नव्हतात. पण तरीही आपण परत आलात, याचा आनंद असल्याचं फडणवीस म्हणाले. नाना पटोलेंचे विशेष आभार, तुम्ही वाट मोकळी केल्यामुळे मागच्या वेळी ते अध्यक्ष बनू शकले, असा टोलाही फडणवीसांनी लगावला.
त्यानंतर एकनाथ शिंदे म्हणाले की, राहुल नार्वेकर यांचं अभिनंदन करतो. मुख्यमंत्री देवेंद्र फडणवीस म्हणाले होते, पुन्हा येईन ते पुन्हा आले त्यांचेही अभिनंदन करतो. त्यामुळे आता विकास आणि प्रगतीचे पर्व सुरु झालं आहे. विरोधी बाकावरील संख्या चिंताजनक आहे, असं व्हायला नको होतं. विरोधी पक्षांच्या अध्यक्ष पदासंदर्भात निर्णय घेण्याचा अधिकार अध्यक्षांचा.
