पुण्यात डान्स टीचरचा चार मुलांवर अनैसर्गिक अत्याचार, वर्गात ‘तो’ शब्द ऐकला अन् प्रकार उघड

पुणे क्राईम :- कर्वेनगर परिसरातील एका नामांकित शाळेत नृत्य शिक्षकाने विद्यार्थ्यांवर अत्याचार केल्याच्या प्रकरणाची व्याप्ती वाढली असून, आतापर्यंत एकूण चार मुलांवर अत्याचार झाल्याच्या तक्रारी करण्यात आल्या आहेत. त्यावरून वारजे माळवाडी पोलिस ठाण्यात दोन स्वतंत्र गुन्हे दाखल झाले आहेत. आरोपी शिक्षकाला अटक करण्यात आली असून, न्यायालयाने चार दिवसांची पोलिस कोठडी सुनावली आहे.

कर्वेनगर परिसरात केंद्रीय माध्यमिक बोर्डाची (सीबीएसई) नामंकित शाळा आहे. या शाळेत नृत्य शिकविण्याच्या बहाण्याने १० ते ११ वर्षीय मुलांवर नृत्य शिक्षकाने अनैसर्गिक अत्याचार केल्याच्या घटना मंगळवारी समोर आल्या. या प्रकरणी दिघी येथे राहणाऱ्या ३९ वर्षीय शिक्षकावर गुन्हा दाखल करण्यात आला आहे. मंगळवारी रात्री उशिरापर्यंत दोन पालक तक्रार देण्यासाठी पुढे आले होते. मंगळवारी रात्री उशिरा कर्वेनगर पोलिस चौकीसमोर पालकांनी गर्दी केली होती. त्यानंतर बुधवारी सकाळी सर्व पालकांनी शाळेत जमावे, असे आवाहन करण्यात आले होते. सकाळी पालकांची बैठक झाली. त्यानंतर आणखी दोन मुलांवरही अत्याचार झाल्याचे सांगून पालकांनी पोलिस ठाण्यात धाव घेतली. एका मुलावर गेल्या दोन वर्षांपासून अत्याचार केला जात असल्याचे तक्रारीत नमूद आहे.

‘ससून’मध्ये मुलांसह पालक ताटकळत ?

दरम्यान, ‘सुरुवातीला दोन मुलांवर लैंगिक अत्याचार झाल्यानंतर पीडित मुलांना वैद्यकीय चाचणीसाठी ससून रुग्णालयात नेण्यात आले. तेथे मुलांसह त्यांच्या पालकांना बराच वेळ ताटकळत ठेवण्यात आले,’ असा आरोप पालकांनी केला आहे. दरम्यान, या प्रकरणी ‘ससून’ प्रशासनाशी संपर्क साधला असता असे घडले नसल्याचे त्यांनी सांगितले.

क्रिकेट मॅचला मुकू, या भीतीने मुलाचे मौन

अलीकडील काळात नऊ डिसेंबरला आरोपीने एका मुलावर अत्याचार केला होता. त्याच्या दुसऱ्या दिवशी त्यांची क्रिकेटची मॅच होती. आरोपी शिक्षकाने केलेले कृत्य घरी सांगितल्यास क्रिकेट मॅचला मुकावे लागेल, अशी भीती विद्यार्थ्यांच्या मनात आली. त्यामुळे त्याने गप्प राहणेच पसंत केले, अशी माहिती पोलिसांनी दिली.

‘रेप’ शब्दावरून आला प्रकार उघडकीस

शाळेमध्ये समुपदेशकाकडून ‘गुड टच, बॅड टच’चा तास घेतला जात होता. त्यात मुले ‘गेम’ खेळत असताना ‘रेप’ शब्दाचा उल्लेख झाला. त्यातून एका मुलाने ‘रेप म्हणजे काय’ अशी विचारणा केली. त्याच्या सोबतच्या मुलांनी त्याच्या प्रश्नाचे उत्तर दिले. ते ऐकून त्यांच्यातील दोन मुलांनी ‘डान्स टीचरने आमच्या सोबत असेच कृत्य केले आहे’ असे सांगितले. ही वाईट गोष्ट असते, असे म्हणून त्या सर्व विद्यार्थ्यांनी समुपदेशकाकडे धाव घेऊन घडलेला प्रकार सांगितला. त्यानंतर लैंगिक अत्याचाराचा विषय उघडकीला आला.

या प्रकरणात आतापर्यंत चार पालकांनी तक्रार दिली आहे. प्रत्येक तक्रारीवरून स्वतंत्र गुन्हा दाखल न करता, एकाच गुन्ह्यात सर्व तक्रारी वर्ग करण्यात येणार आहेत. आरोपीला चार दिवसांची पोलिस कोठडी मिळाली असून, तपास केला जात आहे.