“बिलोली तालुक्यातील मिनकी गावात हृदयद्रावक घटना घडली आहे. मोबाईल घेऊन न दिल्यामुळे एका मुलाने आत्महत्या केली, आणि ही घटना पाहून त्याच्या पित्यानेही गळफास घेऊन जीवन संपवले. या दुर्दैवी घटनेने संपूर्ण गावावर शोककळा पसरली आहे. पाहूया सविस्तर रिपोर्ट.”
“मिनकी येथील राजू लक्ष्मण पैलवार हे मध्यमवर्गीय गृहस्थ आपल्या पत्नी आणि तीन मुलांसोबत राहत होते. त्यांचा मुलगा ओमकार अकरावीच्या वर्गात शिक्षण घेत होता. अभ्यासासाठी मोबाईल घेऊन देण्यासाठी त्याने वडिलांकडे वारंवार मागणी केली होती. मात्र, आर्थिक परिस्थितीमुळे वडिलांनी मोबाईल घेण्यास असमर्थता दर्शवली. बुधवारी रात्री झालेल्या वादानंतर, ओमकारने घराबाहेर जाऊन शेतात गळफास घेतला. त्याच ठिकाणी मुलाचा मृतदेह पाहून वडिलांनीही गळफास घेऊन जीवन संपवले. या दुर्दैवी घटनेची नोंद बिलोली पोलीस ठाण्यात आकस्मिक मृत्यू म्हणून करण्यात आली आहे.”
“मोबाईलसारख्या छोट्या कारणामुळे एका कुटुंबावर असा आघात झाला की, ज्यातून सावरणे कठीण आहे. ही घटना समाजाला मोठा धडा देणारी आहे. पालक आणि मुलांमधील संवाद आणि समजून घेण्याची गरज अधोरेखित करणारी आहे.
