क्रिकेटप्रेमींची प्रतिक्षा अखेर संपली, 10 संघ, 13 शहर, 74 सामने; IPL 2025चे वेळापत्रक जाहीर

मुंबई: इंडियन प्रीमियर लीग म्हणजेच आयपीएल ही जगातील सर्वात लोकप्रिय टी-२० लीग आहे. केवळ भारतातच नाही तर जगभरातील क्रिकेट चाहते इंडियन प्रीमियर लीग (आयपीएल) ची आतुरतेने वाट पाहत असतात. आयपीएलचा आगामी हंगाम पुढील महिन्यापासून सुरू होणार आहे. याआधी आयपीएल २०२५ बाबत एक मोठा खुलासा झाला आहे. आयपीएल २०२५ चे वेळापत्रक जाहीर झाले आहे.
इंडियन प्रीमियर लीग (आयपीएल) चा १८ वा हंगाम २२ मार्च रोजी गतविजेता कोलकाता नाईट रायडर्स (केकेआर) आणि रॉयल चॅलेंजर्स बंगळुरू (आरसीबी) यांच्यातील सामन्याने सुरू होईल. यानंतर दुसऱ्या दिवशी म्हणजे २३ मार्च रोजी दोन सामने खेळवले जातील. पहिला सामना २३ मार्च रोजी सनरायझर्स हैदराबाद आणि राजस्थान राॅयल्स यांच्यात खेळला जाईल. यानंतर, दुसरा सामना चेन्नई सुपर किंग्ज आणि मुंबई इंडियन्स यांच्यात संध्याकाळी ७:३० वाजता खेळला जाईल. या हंगामात लीग टप्प्यात चेन्नई आणि मुंबईमध्ये दोनदा आमनेसामने येतील. त्याच वेळी, ७ एप्रिल रोजी आरसीबी आणि मुंबई यांच्यात फक्त एकच लीग सामना खेळला जाईल. हा सामना मुंबईतील वानखेडे स्टेडियमवर होणार आहे.
आयपीएल २०२५ चा अंतिम सामना २५ मे रोजी खेळला जाईल. सुरुवातीचे आणि अंतिम सामने दोन्ही कोलकात्यातील ईडन गार्डन्स येथे होतील. या लीगचे आयोजन १३ ठिकाणी केलेले आहे. आयपीएल २०२५ मध्ये ६५ दिवसांत एकूण ७४ सामने खेळवले जातील. आयपीएल २०२५ मध्ये, लीग सामने २२ मार्च ते १८ मे दरम्यान खेळवले जातील. यानंतर, २०, २१, २३ आणि २५ मे रोजी प्लेऑफ सामने आयोजित केले जातील.
आयपीएलच्या १८ व्या हंगामाचे सामने एकूण १३ शहरांमध्ये खेळवले जातील. आयपीएल २०२५ चे सामने लखनौ, मुंबई, हैदराबाद, चेन्नई, अहमदाबाद, विशाखापट्टणम, गुवाहाटी, बेंगळुरू, न्यू चंदीगड, जयपूर, दिल्ली, कोलकाता आणि धर्मशाळा येथे खेळवले जातील. आयपीएल २०२५ मध्ये एकूण १२ डबल हेडर सामने आहेत. याचा अर्थ असा की दिवसातून १२ वेळा दोन सामने खेळवले जातील.
दरवर्षी आयपीएलचा पहिला सामना मागील हंगामाचा अंतिम सामना खेळणाऱ्या दोन संघांमध्ये खेळला जातो, परंतु यावेळी तसे होत नाही. गेल्या हंगामाच्या म्हणजेच आयपीएल २०२४ च्या अंतिम सामन्यात कोलकाता नाईट रायडर्स आणि सनरायझर्स हैदराबाद आमनेसामने आले होते, परंतु आयपीएल २०२५ चा पहिला सामना केकेआर आणि आरसीबी यांच्यात खेळला जाईल.