एकनाथ शिंदेंची गाडी उडवण्याची धमकी, दोघे जण ताब्यात, बुलढाणा कनेक्शन समोर

मुंबई :- उपमुख्यमंत्री एकनाथ शिंदे यांच्या शासकीय वाहनाला बॅाम्बने उडवून टाकण्याची धमकी देण्यात आली. यानंतर मोठी खळबळ निर्माण झाल्याचे बघायला मिळाले. गोरेगाव पोलिसांना ईमेलद्वारे ही धमकी पाठवण्यात आली. हैराण करणारे म्हणजे मुंबईतल्या जवळपास 3 ते 4 पोलीस ठाणे आणि इतर विभागात धमकीचा मेल आला होता. आता मुंबई गुन्हे शाखेच्या पथकाने बुलढाणा पोलिसांच्या मदतीने बुलढाणा येथून दोन जणांना ताब्यात घेतले. या दोघांनी जे. जे मार्ग पोलिस ठाणे, गोरेगाव पोलिस ठाणे आणि मंत्रालय या ठिकाणी इमेल करून धमकी दिली होती.

पोलिसांकडून आता पुढील तपास हा केला जातोय. अभय शिंगणे (वय 22), मंगेश वायाळ (वय 35) अशी एकनाथ शिंदे यांच्या शासकीय वाहनाला बॅाम्बने उडवून टाकण्याची धमकी देणाऱ्या आरोपींची नावे आहेत. अभय शिंगणे हा टेक्निशियन आहे तर मंगेश हा चालक आहे. दोघांनी मिळूनच धमक्या दिल्याचे स्पष्ट झाले. पोलिसांनी अवघ्या काही तासांमध्ये आरोपींना ताब्यात घेतले आणि आता त्यांची चाैकशी केली जात आहे.

एकनाथ शिंदे यांच्या नावाने ज्यावेळी धमकी देण्यात आली, त्यावेळी ते दिल्लीला होते. दिल्लीच्या मुख्यमंत्री रेखा गुप्ता यांच्या शपथविधी सोहळ्यासाठी एकनाथ शिंदे हे दिल्लीला गेले होते. एकनाथ शिंदे यांच्या शासकीय वाहनाला बॅाम्बने उडवून देण्याची धमकी देण्यात आल्याने काही काळ खळबळ उडाली होती. सतत एकनाथ शिंदे हे नाराज असल्याची चर्चा रंगताना दिसत आहे. मात्र, एकनाथ शिंदे यांनी अगोदरच स्पष्ट केले की, मी नाराज नाहीये.